montis ascensum est vetus Capella, quam vocant Eliae Prophetae, et locum specialiter appellant Horeb. A cuius latere in montis appendentia colitur vinea, quam nominant Iosuae scophis, de qua quidam putare volunt, quod Sanctus Ioannes Euangelista eam primo plantauit. In superiori vero montis vertice, est Capella, quam dicunt Moysis, et illic rupis seruans adhuc corporis eius formam impressam dum se abscondit, viritus dominum respicere in facie. Locus quoque ibi ostenditur, in quo Deus tradidit ei decem mandata, siue legem proprio digito scriptam, et sub rupe cauerna in qua mansit ieiunus diebus 40. Ab hoc monte qui vocatur Mosi, restat via producta ad quartam Leucae, vsque in montem qui dicitur Sanctae Catherinae per vallem speciosam, ac multum frigidam. Circa eius medium habetur Ecclesia, nomine 40. Martyrum constructa, vbi interdum veniunt Monachi cantare missam: Hic mons est satis altior Monte Moysis, in cuius vertice Angeli Dei pie creduntur attulisse, et sepeliisse corpus sanctissimae Martyris Catherinae cum inuolumento capitis supra dicto. Attamen in ipso certo sepulturae loco, licet quandoque stetit Capella, modo non est habitaculum, sed modicus aceruus petrarum. Notandum, quod vterque horum montium potest vocari mons Sinay, eo quod totus circumiacens locus deserti Sin appellatur. Sur desertum inter mare Rubrum, et solitudinem Sinay. Desertum Sur idem Scriptura quod et Cades. Visitatis igitur a peregrinis his sacrosanctis memorijs, et valefacto Monachis, recommendant se eorum orationibus, et meritis: tuncque solet aliquid victualium offerri peregrinis, pro inchoanda via deserti Syriae versus Ierusalem. Et sicut dixi de priori deserto, sic nec istud secure est peragrandum absque Drogemijs; id est, semitarum ductoribus, propter vastitudinem deserti. CAPVT. 12. Iter a deserto Sinay vsque ad Iudeam.