The mistress o' Bortugh cam ben, Aye blinking sae couthy and canny; But some said she had in her han' A kipple o' bottles o' branny. Sing, Round about Hawick, &c. And some brought dumples o' woo, And some brought flitches o' bacon, And kebbucks and cruppocks enow; But Jenny Muirhead brought a capon. Sing, Round about Hawick, &c. Then up cam the wife o' the Mill, Wi' the cog, and the meal, and the water; For she likit the joke sae weel To gie the bride brose and butter. Sing, Round about Hawick, &c. And first she pat in a bit bread, And then she pat in a bit butter, And then she pat in a sheep's head, Horns and a'thegither! Sing, Round about Hawick, Hawick, Round about Hawick thegither; Round about Hawick, Hawick, Round about Hawick for ever On the Thursday following, George, instead of going to _the shop_, dressed himself in his best Sunday clothes, and, with rather a curious face, went ben to his stepmother, and inquired "what feck o' siller she had about her?" "Siller! Gudeness forgie you, Geordie, for an evendown waster and a profligate! What are ye gaun to do wi' siller the day?" "I have something ado ower at Hawick, and I was thinking it wad be as weel to pay her account when I was there." "Oho, lad! are ye there wi' your dreams and your visions o' the night, Geordie? Ye're aye keen o' sangs, man; I can pit a vera gude ane i' your head. There's an unco gude auld thing they ca', Wap at the widow, my laddie. D'ye ken it, Geordie? Siller! quo he! Hae ye ony feck o' siller, mother! Whew! I hae as muckle as will pay the widow's account sax times ower! Ye may tell her that frae me. Siller! lack-a-day!--But, Geordie, my man--Auld wives' dreams are no to be regardit, ye ken. Eh?"