Peleus, and Nestor and many other mo As Itackes and laertes, sore haue complayned For to longe age, euer full of payne and wo Wherwith theyr bodyes sore haue ben constrayned And with great sorowes and dyuers often payned: And to conclude brefly in one sentence Oft to age falleth moche inconuenyence Yet ar mo folys whiche ought repreued be And they ar suche whiche styll on god doth call For great rowmes, offyces and great dignyte No thynge intendynge to theyr greuous fall For this is dayly sene, and euer shall That he that coueytys hye to clym aloft If he hap to fall, his fall can nat be soft Some other pray for bewty and fayrnes And that to a cursyd purpose and intent Wherby they lese the heuenly blyssydnes: Theyr soule subduynge to infernall turment O ye mad folys of myndes ympotent Pray your Pater noster with deuoute herte and mynde For therin is all that is nedefull to mankynde Our sauyour criste whyle he was on this grounde Amonge vs synners in this vale of mysery Taught his disciples this prayer whiche doth sounde Nere to this sentence, nor greatly doth nat vary (Our father wiche art in heuen) eternally Thy name be halowyd (graunt that to thy kyngdome) All we thy seruauntis worthely may come In heuen and erth thy wyll be done alway And of thy great grace and thy benygnyte Our dayly brede graunt vnto vs this day Forgyuynge our synnes and our iniquyte: As we forgyue them that to vs detters be And to auoyde temptacion thy grace vnto vs len And vs delyuer from euery yll amen. Whan thou hast clensyd thy mynde from syn before And sayd this prayer to thy maker deuoutly Thou nedyst nat of hym to desyre more Yet mayst thou pray and desyre rightwysly For helthe of soule within thy hole body For stedfast fayth and yll name to eschewe. And chastely to lyue (by his help) in vertue Thus sholde thou pray thou wretche both day and nyght With herte and mynde vnto thy creatoure: And nought by foly to asshe agaynst right To hurte or losse to thy frende or neyghboure Nor to thy fo by yll wyll or rygoure But if god to thy prayers alway sholde enclyne Oft sholde come great sorowe to the and to all thyne THE ENUOY OF BARKLAY TO THE FOLYS. Man clere thy mynde or thou begyn to pray Els though thy prayer be iust it is but vayne And kepe togyther thy hurte and tonge alway Or els doutles thou lesest all thy payne From lewde peticions thy mynde thou ought refrayne If thou desyre yll to thy fo by malyce At thy peticion god shall haue dysdayne For though thou be wrothe god is nat in lyke wyse * * * * * Of vnprofytable stody.