Ie vous envoye ce porteur en dilligence pour vous advertir que tout fut yer accorde. Et puis vous dire que le commancement est l’honneur de Dieu service du Roy bien et repoz de ce royaume. Cedit porteur est suffisant et nauront noz chers cardinaulx que part ceste lettre comme aussi nostre mareschal de Brissac qui congnoistra quil y en a qui sont bien loing de leurs desseins. Nostre mere et son frere ne jurent que par la foy quilz nous doibvent et quilz ne veullent plus de conseil que de ceulx que scavez qui vont le bon chemyn. Conclusion la Religion reformee en nous conduisant et tenant bon sen va a baz leaue et les amyraulx mal ce qui est de possible. Toutes noz forces nous demeurent entierement les leurs rompues les billeez rendues sans parler dedictz ne de preches et administracion des sacremens a leur mode. Ces bons seigneurs croiront sil leur plaist cedit porteur de ce quil leur dira de la part de trois de leurs meilleurs amys et bayse la main. De Baugency ce xxv^[e] jour de Iuing 1562. [_No signature_] [_No address_] [_Endorsed_] Extraict d’une lettre escripte de la main de m^[r] de Guyse au Cardinal de Lorraine deXXV^[e] Iuing 1562. APPENDIX IV [P. 155, n. 2] STATE PAPERS, FOREIGN ELIZABETH, VOL. XXXIX, NO. 211, vj [_Letter of the duke of Aumale to Catherine de Medici_] [_1562, Iuly 9_] Madame, je viens presentement de recevoyr la lettre quil vous a pleu mescripre touchant quelques marchandz anglois que lambassadeur de leur Royne vous a faict entendre avoyr este prys par les gens de guerre qui sont icy pres de moy pour le service du Roy et le vostre. Dont encores Madame je navois ouy parler, bien de quelques soldatz anglois qui furent pris y a assez long temps par le s^[r] Dallegre qui voulloient entrer a Rouen et lesquelz tost aprez je feiz renvoyer sinon quelques ungs qui se sont voluntairement mys a vostre service parmy noz bandes vous pourrant asseurer Madame, que tant sen fault que je permecte telles choses Que tout ce que jay en plus grande recommendation, est de les laisser librement et tous les autres estrangers qui sont icy mesmes voz subiectz de quelque religion quilz soient de trafficquer et negotier comme ilz faisoient au paravant ses troubles, sachant trop bien de quelle consequence cella est pour vostre service. Et ne puis penser dou viendroit ceste prise si ce nest par ceulx mesmes de Rouen Dieppe et le Havre qui pillent et prennent indifferemment sur les ungs et les autres sans aucune exception. Toutesfois Madame, je mectray peyne de faire si bien rechercher parmy ses trouppes que sil y en a aucuns qui en ayent quelque chose je la feray delivrer et nen sera perdu ung seul denyer, ainsy que je lay faict entendre a ce present porteur que ledit ambassadeur ma envoye expres. Madame je prye Dieu vous avoyr en sante et donner tresbonne et longue vye. Au Mesnil devant S^[te] Catherine le ix^[e] jour de Juillet 1562. Vostre treshumble et tresobeissant serviteur et subiect CLAUDE DE LORAYNE