'for his better preferring to the day of the assys, was put in ane lockfast buith, quhair no maner of persoun might haif access to him quhil the dounsitting of the justice court, and for avoyding of putting violent handis on himself, was verie strictly gairdit and flitherit be the airms, as us is, and upon that same day of the assys, about half ane hour befoir the doun sitting of the justice court, Mr. David Dickson, minister at Irving; and Mr. George Dunbar, minister of Air, having went to him to exhort him to call on his God for mercie for his bygane wicked and evil lyf and that God wold of his infinite mercie, lowis him out of the handis of the devil quhom he had servit thir mony years by gane He acquiescit to their prayer and godlie exhortation, and utterit thir wordis—I am so straitlie gairdit that it lyis not in my hand to tak off my bonnett, nor to gett bread to my mouth. And immediately after the departing of the two ministers from him, the Juglour being sent for at the desyr of my Lord of Eglintoune, to be confrontit with ane woman of the burgh of Air, callit Janet Bous, quha was apprehendit by the Magistrates of the burghe of Air, for witchcraft, to the burghe of Irvine, purposlie for that effer. He was fund be the burrow officers, quha went about him stranglit and hangit be the cruik of the dur, with ane tait of hemp (or a string maid of hemp, supposed to haif been his garten, or string of his bonnet) not above the length of twa span long, his kneyis not being from the grund half ane span, and was brocht out of the hous, his lyf not being so layt expellit: but notwithstanding of quhatsomever meines usit to the contrair for remeid of his lyf, he revievit not, but so endit his lyf miserable by the help of the devill his maister.'[823]