1576. Bessie Dunlop of Lyne, Ayrshire. Thom Reid apperit in hir awin hous to hir, about the xij hour of the day, quhair thair was sittand thre tailzeouris, and hir awin gudeman; and he tuke hir apperoun and led hir to the dure with him, and sche followit, and zeid [went] vp with him to the kill end, quhair he forbaid hir to speik or feir for onye thing sche hard or saw; and quhene thai had gane ane lytle pece fordwerd, sche saw twelf persounes, aucht wemene and four men: The men wer cled in gentilmennis clething, and the wemene had all plaiddis round about thame, and wer verrie semelie lyke to se; and Thome was with thame: And demandit, Gif sche knew ony of thame? Ansuerit, Nane, except Thom. Demandit, What thai said to hir? Ansuerit, Thai baid hir sit down, and said, 'Welcum, Bessie, will thow go with ws?' Bot sche ansuerit nocht; becaus Thom had forbidden hir. And forder declarit, That sche knew nocht quhat purpois thai had amangis thaime, onlie sche saw thair lippis move; and within a schort space thai pairtit all away; and ane hiddeous vglie sowche of wind followit thame: and sche lay seik quhill Thom came agane bak fra thame. [In the margin, 'Confessit and fylit.'] Item, Sche being demandit, Gif sche sperit at Thom quhat persounes thai war? Ansuerit, That thai war the gude wychtis that wynnit in the Court of Elfame; quha come thair to desyre hir to go with thame: And forder, Thom desyrit hir to do the sam; quha ansuerit, 'Sche saw na proffeit to gang thai kynd of gaittis, vnles sche kend quhairfor'. Thom said, 'Seis thow nocht me, baith meit-worth, claith-worth, and gude aneuch lyke in persoun, and [he] suld make hir far better nor euer sche was?' Sche ansuerit, 'That sche duelt with hir awin husband and bairnis, and culd nocht leif thame.' And swa Thom began to be verrie crabit [angry] with hir, and said, 'Gif swa sche thocht, sche wald get lytill gude of him.' ... Interrogat, Gif sche neuir askit the questioun at him, Quhairfoir he com to hir mair [than] ane vthir bodye? Ansuerit, Remembring hir, quhen sche was lyand in chyld-bed-lair, with ane of hir laiddis, that ane stout woman com in to hir, and sat doun on the forme besyde hir, and askit ane drink at hir, and sche gaif hir; quha alsua tauld hir, that that barne wald de, and that hir husband suld mend of his seiknes. The said Bessie ansuerit, that sche remembrit wele thairof; and Thom said, That was the Quene of Elfame his maistres, quha had commandit him to wait vpoun hir, and to do hir gude. Confessit and fylit.[928]