Le Vendredy 20 Iuin 1614 ledit Lieutenant procedant à l'audition dudit Neuillon couureur & Masson, aagé de 77 ans. Ledit Lieutenant Criminel luy ayant dit qu'il luy vouloit faire raire ou razer le poil & changer d'habits: afin qu'il dict verité. L'accusé s'escria en ces mots, Comment me veut-on faire mourir, Messieurs, si ie vous confesse la verité, vous ne me ferez pas razer. A confessé auoir esté au Sabbat prez Nouan, en vn lieu nommé Oliuet. Dit que le Sabbat se tenoit dans vne maison, où il vit à la cheminée co[~m]e ledit Sabbat se faisoit, vn homme noir duquel on ne voyoit point la teste, & deux cheures ou boucs en la mesme maison ayant grand poil noir. Il y auoit 200. personnes tous masquez, excepté vn nommé Ferrand. Qu'allant à l'offrande aucuns baillent de l'argent comme à l'Eglise. Vit aussi vn grand homme noir à l'opposite de celuy de la cheminée, qui regardoit dans vn liure, dont les feuillets estoient noirs & bleuds, & marmotoit entre ses dents sans entendre ce qu'il disoit, leuoit vne hostie noire, puis vn calice de meschant estain tout crasseux. Vit que tous les assistans dançoient en bransles dos à dos, & deux boucs ou cheures auec eux. Il y auoit des viandes si fades qu'il n'en peut aualler, & croit que c'estoit de la chair de cheual, & que ledit ho[~m]e noir parloit comme si la voix fut sortie d'vn poinson: Et vit enuiron douze enfans portez par des femmes, & que le Diable batit vne femme auec vn baston, de ce qu'elle n'auoit pas apporté son enfant comme elle auoit promis, bailloit ledit homme noir des gasteaux auxdits petits enfans. Dit que ceux qui ne vont au Sabbat, payent huict sols, qu'il y a des processions où il a veu par fois six cens personnes, que les deux Diables qui estoient au Sabbat, l'vn s'appelloit l'Orthon, & l'autre Traisnesac, & qu'ils se baissoient enuers ceux qui leur emmenoient leurs enfans comme pour les remercier, & baisoient leursdits enfans au cul. Dit qu'il a veu le Diable en plusieurs façons, tantost comme vn bouc, ayant vn visage deuant & vn autre derriere, ores comme vn gros mouton. Qu'on baptise des enfans au Sabbat auec du Cresme, que des femmes apportent, & frottent la verge de quelque homme, & en font sortir de la semence qu'elles amassent, & la meslent auec le Cresme, puis mettent cela sur la teste de l'enfant en prononçant quelques paroles en Latin. Dit aussi auoir veu des Sorciers & Sorcieres qui apportoient des Hosties au Sabbat, lesquelles elles auoient gardé lors qu'on leur auoit baillé à communier à l'Eglise, & que le Diable faisoit des gestes comme en depitant sur icelles Hosties, desquelles on faisoit de la poudre, & quelque fois on les mettoit dans l'eau, & que le Diable estoit fort ayse quand on luy apportoit lesdites Hosties. Dit auoir ouy dire à Guilleaume le Clerc dit Nitelle, que pour auoir faict mourir vn homme le Diable donnoit de recompence huict sols, & pour vne femme cinq sols.