* * * * * Gentil ou Gentiẽ le Clerc dit, que sa mère le presenta (dit-on) en l'aage de trois ans au Sabbat, à vn bouc, qu'on appelloit l'Aspic. Dit qu'il fut baptisé au Sabbat, au Carroir d'Oliuet, auec quatorze ou quinze autres, & que Ieanne Geraut porta du Chresme qui estoit jaune dans vn pot, & que ledit Neuillon ietta de la semence dans ledit pot, & vn nommé Semelle, & broüilloient cela auec vne petite cuilliere de bois, & puis leur en mirent à tous sur la teste. Il vit marquer plusieurs personnes, mais les femmes principalement entre les tetins. Qu'on baille à baiser la paix comme à l'Eglise, & que cela semble vne tuille, & qu'on y baille vn denier ou vn double allant à l'offrande, l'eau beniste est iaune comme du pissat d'asne, & qu'apres qu'on la iettée on dit la Messe, & que c'est le Diable qui la dit, qu'il a vne Chasuble qui a vne croix: mais qu'elle n'a que trois barres: & tourne le dos à l'Autel quand il veut leuer l'Hostie & le Calice, qui sont noirs, & marmote dans vn liure, duquel la couuerture est toute veluë comme d'vne peau de loup, auec des feuillets blancs & rouges, d'autres noirs. Et quand ledit homme noir a ietté, ou iette de l'eau beniste, chacun des assistans, se iette en terre comme on faict à l'Eglise sur la fosse des trespassez, auec vn morceau de hou qui a trois feuilles au bout. Après la Messe on dance, puis on couche ensemble, hommes auec hommes, & auec des femmes. Puis on se met à table, où il n'a iamais veu de sel. Et n'y a autre viande que grenouille & anguilles, & point de vin ains de l'eau. Dit qu'il a cognu des hommes & s'est accouplé auec eux; qu'il auoit vne couppe ou gondolle par le moyen de laquelle toutes les femmes le suiuoient pour y boire. Qu'au Sabbat on y blasphemoit souuent, disant chardieu, c'est vne belle chose qu'ils font blanchir pour qu'on la voye de plus loing, & puis la mangent, & quand ils l'ont mangé il n'y en a plus, que les Prestres font cela pour amuser le monde, & que c'est vn beau Ianicot, qu'il y auoit plus d'acquest en sa Marionette qu'en Dieu. Et auoit veu souuent la Marionette dudit Neuillon, qui est comme vn gros crapaut tout noir, comme d'vne fourrure noire, & estoit dans vne boëtte caché soubs vn carreau, qui sautoit & leuoit quand on vouloit donner à manger audit crapaut. Qu'il l'a veu encore puis six sepmaines en la ruelle du lict dudict Neuillon, & qu'il a veu qu'il l'apportoit vne autre fois dans son manteau, qu'il luy a dit vne douzaine de fois, que s'il vouloit il luy en feroit auoir vne. Qu'il y auoit plus profit en icelle qu'en Dieu, & qu'il ne gagnoit rien à regarder Dieu: mais que sa Marionette luy apportoit tousiours quelque chose. Confesse auoir faict mourir plusieurs personnes, & qu'il sçait faire dancer les bœufs dans vn cercle qu'il fait, & qu'vne vieille luy apprins.