When that the Bischoppis, with thare complices, had accused this innocent man, in maner and forme afoirsaid, incontinentlie thei condemned him to be brynt as are Heretike, not having respect to his godly answeris and trew reassones which he alledged, nor yitt to thare awin consciences, thinking verelye, that thei should do to God good sacrifice, conformable to the sayingis of Jesus Christ in the Gospell of Sanct Johnne, chapter 16: "Thei shall excommunicat yow; yea, and the tyme shall come, that he which killeth yow shall think that he hath done to God good service." THE PRAYER OF MAISTER GEORGE. "O Immortall God! how long sall thow suffer the woodnes and great crudelitie of the ungodlie to exercise thare furie upoun thy servandes, which do further thy word in this world, seing thei desyre to do the contrarie, that is, to chok and destroy thy trew doctrin and veritie, by the which thow hast schewed thee unto the world, which was all drouned in blyndness and mysknowledge of thy name. O Lord, we know suirlie, that thy trew servandes most neidis suffer, for thy names saik, persecutioun, afflictioun, and troubles in this present lyef, which is but a schaddow, as thow hast schewed to us, by thy Propheittis and Apostles. But yitt we desyre thee, (Mercyfull Father,) that thow conserve, defend, and help thy Congregatioun, which thow hast chosen befoir the begynning of the world, and give thame thy grace to hear thy word, and to be thy trew servandis in this present lyef." Then, by and by, thei caused the commoun people to remove,[427] whose desyre was alwyise to hear that innocent speak. And the sonis of darknes pronunced thare sentence definitive, not having respect to the judgement of God. When all this was done and said, my Lord Cardinall caused his tormentares[428] to pas agane with the meke lambe unto the Castell, untill such tyme the fyre was maid reddy. When he was come into the Castell, then thare came two Gray feindis, Freir Scott and his mate, saying, "Schir, ye must maik your confessioun unto us." He answered, and said, "I will mak no confessioun unto yow. Go fetch me yonder man that preached this day, and I will maik my confessioun unto him." Then thei sent for the Suppriour of the Abbay,[429] who came to him with all dilegence; but what he said in this confessioun, I can not schaw.[430]