Alexander Erle of Glencarne,[618] yitt alyve, said to the Bischope of Orknay,[619] and otheris that satt ney him, "Tack yow yon, my Lordis of the Clargye;[620] for hear I protest, for my parte, that I consent nott to his death." And so, without fear, prepared the said Adam to answer. And first, to the baptising of his awin child, he said, "It was and is als lauchfull to me, for lack of a trew minister, to baptise my awin child, as that it was to Abraham to circumcise his sone Ismael and his familie. And as for Purgatorie, praying to Sanctes, and for the dead, I have oft redd, (said he,) boith the New and Old Testamentis, but I nether could find mentioun nor assurance of thame; and tharefoir, I beleve, that thei ar but mear inventionis of men, devised for covetousnes saik." "Weall, (quod the Bischope,) ye hear this, my Lordis." "What sayis thow of the Messe?" spearis the Erle of Huntley. He ansuered, "I say, my Lord, as my master Jesus Christ sayis, 'That which is in greatast estimatioun befoir men, is abomination befoir God.'" [SN: LUCAE. [16.]] Then all cryed out, "Heresye! heresye!" And so was the sempill servand of God adjudged to the fyre; which he patientlie susteaned that same day, at after nune, upoun the Castell-hill.[621] And so began thei agane to pollute the land, which God had laitlie plagued; for yitt thare iniquitie was nott come to so full rypnes, as that God wold that thei should be manifested to this hole realme, (as this day thei ar,) to be faggottis prepared for the everlesting fyre, and to be men whome nether plagues may correct, nor the light of Goddis woorde converte from thare darknes and impietie.