DEIRLIE BELOVED in the Lord, the Faithfull that ar of your acquentance in thir partes, (thankis be unto God,) ar stedfast in the beleve whareinto ye left thame, and hes ane godly thrist and desyre, day by day, of your presence agane; quhilk, gif the Spreat of God will sua move and permitt tyme unto yow, we will hartly desyre yow, in the name of the Lord, that ye will returne agane in thir partes, whare ye shall fynd all faithfull that ye left behynd yow, not only glaid to hear your doctrin, but wilbe reddy to jeopard lyffis and goodis in the forward setting of the glorie of God, as he will permitt tyme. And albeit the Magistraittis in this countrey be as yitt but in the staite ye left thame, yitt at the maiking heirof, we have na experience of any mair crueltie to be used nor was befoir; but rather we have beleve, that God will augment his flock, becaus we see daly the Freiris, ennemyes to Christis Evangell, in less estimatioun, baith with the Quenis Grace, and the rest of the Nobilitie of our realme. This in few wordis is the mynd of the faithfull, being present, and otheris absent. The rest of our myndis this faythfull berare will schaw you at lenth. This, fair ye weill in the Lord. Off Striveling, the tent of Marche, Anno 1556.[699] (This is the trew copy of the bill, being subscrived by the names underwrittin,) _Sic subscribitur_, GLENCARNE. LORNE, (now ERGYLE.) ERSKYN. JAMES STEWART. These letteris war delivered to the said Johne in Geneva, by the handis of James Sym, who now resteth with Christ, and of James Barroun, that yit liveth,[700] in the moneth of Maij immediatlie tharefter. Which receaved, and advised upoun, he took consultatioun alsweall with his awin church as with that notable servand of God, Johne Calvin, and with other godlie ministers, who all with one consent, said, "That he could nott refuise that Vocatioun, onless he wald declair him self rebellious unto his God, and unmercyfull to his contrie." And so he returned answer, with promessis to visite thame with ressonable expeditioun, and so sone as he mycht putt ordour to that dear flock that was committed to his charge. And so, in the end of the nixt September after, he departed from Geneva, and came to Deape, whare thare mett him contrare letteris; as by this his answer thareto we may understand. _The Spreit of wisdom, constancie, and strenth be multiplied with yow, by the favour of God our Father, and by the grace of our Lord Jesus Christ._