[ANSWER.]--Forsuyth, it is your dewitie to wische good unto my Hous, and unto thame that ar cuming of the same, not allanerlie for the faythfulnes, amitie, and societie, that hes bein betuix our foirbearis, but also for the lait conjunction of blood[717] that is betuix oure saidis Houssis, gif it be Goddis pleasur that it have success; quhilk should give sufficient occasioun to your Lordschip to wische good to my Housse, and perpetuitie with Goddis gloir, without quhilk nothing is perpetuall, unto whome be praise and wirschipe for ever and ever. Amen. 3. Thridly, your Lordschip declares how displeasand it is to yow, that I should be seduced be ane infamed persone of the law,[718] and be the flatterie of ane mensworne apostate, that, under pretence of his furth geving, maikis us to understand, that he is ane preachear of the Evangell, and tharewith rases schismes and divisionis in the haill Kirk of God; and be our mantenance and defence, wald infect this countrey with heresye; alledgeand that to be Scripture, whilk thir many yearis bygane, hes bein condemned as heresye be the Generall Counsallis and haill estate of Christiane people. ANSURE.--The God that creatted heavin and earth, and all that thairin is, preserve me fra seduceing; and I dread otheris many under the cullour of godlynes ar seduceid, and thinkis that thei do God a pleasur, when thei persecute ane of thame that professes his name. What that man is of the law we know nott: we hear nane of his flatterie: his mensworne aith of apostasie is ignorant to us. But yf he had maid ane unlefull aith, contrair Goddis command, it war bettir to violate it then to observe it. He preaches nathing to us but the Evangell. Giff he wald otherwiese do, we wold nott beleve him, nor yitt ane angell of heavin. We hear him sawe na schismes nor divisiones, but sic as may stand with Goddis word, whilk we shall caus him confesse in presence of your Lordschip and the Clargie, when ye requyre us thairto. And as to it that hes bein condempned be the Generall Counsallis, we traist ye knaw weall that all the Generall Counsalles hes bein at diversitie amanges thame selfis, and never twa of thame universallie aggreing in all pointis, in samekle as thei ar of men. But the Spreit of veritie that bearis testimony of our Lord Jesus hes nott, nether can not, err; "for heavin and earth shall perishe or ane jote of it perishe." By this, my Lord, nether teaches he, nether will we accept of him, but that whilk aggreis with Goddis synceir word, sett furth be Patriarkis, Prophetis, Apostles, and Evangelistis, left to our salvatioun in his expresse word. And swa, my Lord, to condempne the doctrin not examinat is not requyred; for when your Lordschip pleassis to hear the confessioun of that manis faith, the