trew and faithfull subjectis. God move your Graces harte favorablie to interpreite our faythfull meanyng. Further advertissing your Grace, that the self same thing, together with all thingis that we have done, or yitt intend to do, we will notifie by our letteris to the King of France; asking of yow, in the name of the eternall God, and as your Grace tenderis the peace and qwyetness of this realme, that ye invaid us nott with violence, till we receave ansur from our Maistres, hir Husband, and from thare advised counsall thare. And this we committ your Grace to the protectioun of the Omnipotent. "Frome Sanet Johnestoun the 22 of Maij 1559. (_Sic subscribitur_,) Your Grace's obedient subjectis in all thingis not repugnant to God, "THE FAITHFULL CONGREGATIOUN OF CHRIST JESUS IN SCOTLAND." In the same tennour we wrate to Monsieur Dosell in Frenche, requiring of him, that by his wisdome he wold mitigate the Quenis raige, and the raige of the Preastis; otherwyis that flambe, whiche then begane to burne, wold so kendle that quhen some men wold, it culd not be slokenned; adding farder, that he declairit him self[781] no faithfull servand to his maister the King of France, yf for the plesour of the Preistis he wald persecut us, and so compell us to taik the sweard of just defence. In lyke maner we wrait to Capitane Serra la Burse, and to all uther Capitanis and Frenche soldiouris in generall, admonischeing thame that thair vocatioun was nocht to fyght aganis us naturall Scottishmen; nather yit that thai had any suche commandiment of thair maister. We besowght thame thairfoir nocht to provok us to inemitie aganest thame, considdering, that thay had found us favorable in thair most extreme necessiteis. We declairit farther unto thame, that yf thay enterit in hostilitie and bloody warre aganest us, that the same sould remane langar than thair and oure lyves, to witt, evin in all posteriteis to come, so lang as naturall Scottishmen suld have power to revenge suche crewelty, and maist horribill ingratitude.