MAIST GRATIOUS AND SOVERING LORD under the Lord and King of all, of whome only thy Hienes and Majestie has power and authoritie to exercise justice within this thy Realme, under God, who is King and Lorde of all realmes, and thy Grace and all mortale Kingis ar bott onlye servandis unto that onlie immortall Prince Christ Jesus, etc. It is nott (I wate) unknawin to thy gratious[106] Hieness, how that thy Grace's umquhill servand and Oratour, (and ever shalbe to my lyves end,) is departed out of thy Realme unto the nixt adjacent of Ingland. Nochtheless I beleve the causse of my departing is unknawin to thy gratious[107] Majestie: quhilk only is, becaus the Bischoppis and Kirkmen of thy Realme hes had heirtofoir sick authoritie upoun thy subjectis, that appearandly thei war rather King, and thow the subject, (quhilk injust regiment is of the selfe false, and contrair to holy Scripture and law of God,) than thow thair King and maistir, and thei thy subjectis, (quhilk is verray trew, and testifiet expreasslie be the Word of God.) And also, becaus thei will give no man of onye degree or staite (whome thei oft falslie call Heretykis) audience, tyme, nor place to speak and have defence; quhilk is aganist all law, boith the Ald law, called the Law of Moses, and the New law of the Evangell. So that, gif I mycht have had audience and place to speak, and have schawin my just defence, conforme to the law of God, I should never have fled to any uther realme, suppose it should haif cost me my lyiff. Bot becaus I beleved that I should haif haid no audience nor place to answer, (thei ar so great with thy Grace,) I departed, not dowttand, bott moved of God, unto ane bettire tyme that God illuminate thy Grace's eyn, to give everie man audience (as thow should and may, and is bound of the law of God,) who ar accused to the death. And to certifie thy Hienes that thir ar no vane wordis, bot of dead and effect, heir I offer me to thy Grace to come in thy realme agane, so that thy Grace will give me audience, and hear what I have for me of the law of God: and caus ony Bischope or Abbot, Frear or Secular, quhilk is maist cuning, (some of thame cane not read thair matynes who ar maid judgeis in heresye!) to impugne me be the law of God; and give my parte be found wrang, thy Grace being present and judge, I refuse no pane worthie or condigne for my falt. And give that I convict thame by the lawe of God, and that thei have nothing to lay to my charge, bot the law of man, and thair awin inventionis to uphald thair vane glorie and prydfull lyif, and dalye scorgeing of thy poore liegis; I reporte me to thy Grace, as judge, Whither he hes the victorye that haldis him at the law of God, quhilk cane not faill nor be false, or thei