that haldis thame at the law of man, quhilk is rycht oft plane contrarie and aganis the law of God, and thairfoir of necessitie fals, and full of lesingis? for all thing that is contrarie to the veritie, (quhilk is Christ and his law,) is of necessitie ane lesing. And to witnes that this cumis of all my harte, I shall remane in Berwik whill I gett thy Grace's answer, and shall without faill returne, haveing thy hand wreitt that I may haif audience, and place to speak. No more I desyre of thee; whaireof gif I had bene suire, I should never have departed. And that thow may know the treuth thairof, gif feare of the justness of my cause, or dredour of persequutioun for the same, had moved me to departe, I wold not so pleasandlie reverte: only distrust thairfoir was the caus of my departing. Pardone me to say that quhilk lyes to thy Grace's charge. Thow arte bound by the law of God, (suppoise thei falslie lye, saying it perteanes nott to thy Grace till intromett wyth sic materis,) to caus everie man, in any case, accused of his lyef, to have his just defence, and his accusaris produceit conforme to thair awin law. Thei blynd thy Grace's eyn, that knawis nothing of thair law: bot gif I prove nocht this out of thair awin law, I offer me to the death. Thy Grace, thairfoir, by experience may daly learne, (seing thei nether fear the King of Heavin, as thair lyves testiffis, neyther thee thair naturall Prince, as thare usurped power in thy actionis schawis,) why thy Hienes should lye no langar blindit. Thow may considder, that thei pretend nothing ellis bot only the mantenance and uphald of thair bardit mullis,[108] augmenting of thare insatiable avarice, and continewall doune thringing and swallowing up thy poore lieges; nether preaching nor teaching out of the law of God, (as thei should,) to the rude, ignorant people, bot ay contending wha may be maist hie, maist riche, and nerrest thy Grace, to putt the temporall Lordis and liegis out of thy counsall[109] and favour, who should be, and ar, maist tendir servandis to thy Grace in all tyme of neid, to the defence of thee and thy croune.