_Item_, We have thocht gude for building and uphald of the placis, ane general collect be maid; and that everie Erlis sone, at his entre to the Universitie, shall gif fourtye schillingis, and sicklike at everie graduatioun, 40 schillingis. _Item_, Everie Lordis sone sicklike at ilk tyme, 30 schillingis; ilk fre halding Baronis sone, twentye schillingis: everie Fewar and substantious Gentilmannis sone, ane mark. _Item_, Everie substantious Husband and Burges sone, at ilk tyme, ten schillingis: _Item_, Everie ane of the rest, (excepting[488] the Bursaris,) 5 schillingis at ilk tyme. [488] In edit. 1621, "not excepting." And that this be gathered in ane commoun box, put in keiping to the Principall of the Theologeanes, everie Principall havand ane key thairof, to be comptit ilk yeare anis, with the relictis of the Principallis to be layed into the samin, about the fivetene day of November, in presence of the Superintendent, Rectour, and the hoill Principallis; and, at thair hoill consent, or at the least the most part thairof, reservit and employit onlie upoun the building and uphalding of the placis, and repairing of the same, as ever necessitie shall require. And thairfore, the Rectour with his assistance shall be haldin to visite the placis ilk yeir anis, incontinent efter he be promoted, upoun the last of October, or thairby. VI. OFF THE PRIVILEGE OF THE UNIVERSITIE. Seing we desire that Innocencie shall defend us rather than Privelege, we think that ilk persoun of the Universitie shuld answeir before the Provest and Baillies of ilk town whaire the Universities ar, of all crymes whairof thai ar accusit, onlie that the Rectour be Assesour to thame in the saidis actionis. In civill materis yf the questioun be betwix memberis of the Universitie on ilk side, making thair residence and exercitioun thairin for the tyme, in that case the partie callit shall not be haldin to answer, but onlie before the Rectour and his Assesouris heirtofore expremit. In all uthir casses of civill persute, the generall reule of the Law to be observit, _Actor sequatur forum rei, &c._ _Item_, That the Rectour and all inferiour memberis of the Universitie be exempted frome all taxationis, impostis, chargeis of weir, or ony othir charge that may onerat or abstract him or thame from the cair of thair office; suche as Tutorie, Curatorie, Deaconrie, or ony siclike, that ar establischeit, or heirefter shall be established in our Common-wealth; to the effect, that but trubill, that ane may wait upoun the upbringing of the youth in learnyng, that othir bestow his tyme onlie in that most necessarie exercitioune.