theym of Godds chirch, of Chalesses, Crosses of sylver, Boxes for the Sacrament, and other onourments longyng therunto, of defoulyng and ravisshing religious wymmen, wedowes and maydens, of unmanly and abhomynable entretyng of wymmen beyng in the naturall labour and bataille of travailyng of child, by the moyne therof piteously disperaged, Heven sorowyng the lost therby of the Soules that shuld have been of the felauship of Cristendom and of the blisse of Heven, not abhorryng of unmanly, unnaturall and beestly cruelte to drawe wymmen beyng in childebedde from their bedds naked, and to spoile hem of all her goods, a piteous desolacion. The same Henry, actour, factour and provoker of the seid commocion, and assentyng of covyne with the seid Margarete, Henry Duc of Somerset, and Henry late Erle of Northumberlond, in a battaille to be shewed unto hym, and offered of fraudulent dissimilacion, in a feld beside the toune of Seint Albones, the XVII day of Feverer last past, not joynyng his persone and blode to the defence, tuition and salvacion of the same Lordes and persones commen to assist hym by his auctorite and commaundement, lyke a victorious and a noble captayne, but lyke a disseyvable coward, ayenst princely and knyghtly duetee, sodenly, privately and shamefully refused theym, sufferyng and procuryng to disseivably th’effucion of their blode, and horrible murdre and deth, not havyng therof sorowe, pitee or compassion; adheryng to the seid Margaret, and to the seid Duc of Somerset, and other Lordes and persones that committed the seid orrible and cruell murdre of the seid Duc of York, and of the Erles of Rutlond and Salesbury, and also of the seid people, in the seid felde beside the seid toune of Seint Albones, yevyng therfor to the seid Duc and other assistyng theym therin, a speciall laude and thank; from thensforth appliyng to theym and to their outrageous and unlawfull riotts and misgovernaunce; after that sufferying wilfully thoo worthy and good Knyghtes, William Lord Bonvile, and Sir Thomas Kiryell, for the prowesse of knyghthode approved in their persones called to the order of the Garter, and William Gower Squier, the Berer of oon of his Baners, whom to he made feith and assurans under Kynges word, proeedyng from his mouth, to kepe and defend theym there from all hurt, joupardie and perell, to be murdred, and after that tyrannyously heded, with grete violence, withoute processe of lawe or any pitee, contrary to his seid feith and promysse, abhomynable in the heryng of all Christen Prynces. For asmoch also as Henry Duc of Somerset, purposyng, ymaginyng and compassyng, of extreme and insaciate malice and violence, to destroy the right noble and famous Prynce of wurthy memorie, Richard late Duc of York, fader to oure Liege and Soverayne Lord Kyng Edward the