past, stured, laboured and provoked the ennemyes of oure seid soverayne Lord Kyng Edward the Fourth, of outeward landes, to entre into his seid reame with grete bataille, to rere werre ayenst his astate within this seid reame, to conquere the same from his possession and obeysaunce, to depose hym of roiall astate, corounes and dignite, and to destroy his moost noble persone and subgetts. And where also the same Margarete, and Edward her son, and also the seid Henry Duc of Excestr’, Thomas Grey Lord Rugemonde Grey, Humfrey Dacre Knyght, Edmund Hampden Knyght, Robert Whityngham Knyght, Henry Bellyngeham Knyght, and Richard Tunstall Knyght, adheryng to the Scotts, ennemyes of oure seid soverayne Lord Kyng Edward the Fourth, convened with the same Scotts, procuryng, desiring and wagyng theym to enter into his seid reame, to make there werre ayenst his Roiall Majeste, bringyng the same Scotts and ennemyes to his cite of Carlile, besegyng and envirounyng it, brennyng the subarbes therof, distroiyng the howses, habitacions and landes of his subgetts nygh therunto, in manere of conquest; purposyng, ayenst their feith and liegeaunce, to have delyvered the seid cite, the key of the Westmarches of Englond, into the possession and obeysaunce of the seid Kyng of Scotts, and to have spoiled the coroune of Englond therof, as they didde of the seid toune of Berwyk. And over that, where the seid Henry, late called Kyng of Englond the Sixt, and also Thomas Lord Roos, Thomas Gray Lord Rugemond Grey, Humfrey Dacre Knyght, John Fortescu Knyght, William Tailboys Knyght, Edmund Mountford Knyght, Thomas Nevill late of Brauncepath in the Bisshopryke of Durham Clerk, Humfrey Nevill late of the same Squier, and Thomas Elwyke late of Caleys Squier, the XXVI day of Juyne last past, at Ryton and Brauncepath in the Bisshopryke of Durham, with standardes and gyturons unrolled, rered werre ayenst oure seid Lord Kyng Edward, purposying to have deposed hym of his roiall astate, coroune and dignite, ayenst their feith and liegeaunce. And for asmoch also as Henry Duc of Excestre, Jasper Erle of Pembroke, and Thomas Fitz Herry late of Herford Squier, at a place called Tutehill, besid’ the toune of Carnarvan in Wales, on Friday next after the fest of Translacion of Seint Edward last past, rered werre ayenst the same oure soverayne Lord, purposyng then and there to have proceeded to his destruction, of fals and cruell violence, ayenst their feith and liegeaunce.”