"Last vacans" (quoth he), "I gaed awa' to my uncle's, or rather my grandfather's, to stap a week or twa, and play mysel' amang the Moorhills, neive trouts, and learn twa or three tunes on the flute. Weel, I hadna been there ony time aworth till I saw as queer a thing as ought ever I saw, or may see. A'm out at the house-en' ae morning, about aught o'clock, and a bonny harrest morning it was: Weel, ye see, a'm making a bit grinwan to mysel' to tak' down wi' me to a deep pool that was i' the burn fu' o' trouts, and this I was gaun to do after breakfast time, for as yet I hadna gat my sowens. Weel, ye see, I'm tying on my grin wi' a bit o' wax'd thread, whan by the house-en' comes my auld grandfather wi' his clicked staff, that he ay had wi' him, in ae han', and in the tither his auld loofie o' a mitten, which he hadna as yet drawn on. He cam' close by me, and gaed a kinn o' a luik at what I was doing, then wised himsel' awa' alang the hip o' o'e hill, to look how the nowt did, and twa young foals, as was his usual wont. Weel, awa' he gaed; I was sae thrang when he gaed by that I never spake to him, neither did he to me, and I began to think about this when I was mair at leisure, and gaed a glent the road he tuik, just to see like how the auld body was coming on, for he was on the borders o' four score, yet a fearie fell auld carle, and as kine a body as ever I saw; sae I gaed a glent, as I was saying, alang by the scarrow o'e hill, and did see him winglan awa' by the back side o' the auld saugh Lochan. And in course o' time, maybe no' ten minutes after, I stepped my waes in to see gin I could get a cap or twa o' sowens and get off to the trouts; whan wha think ye's just sitting on the sattle-stane at the ingle-cheek taking a blaw o' the pipe--but auld granfaither. 'Lord, preserve me,' said I, and said na mair; I glowr'd about me awsomly. 'What's wrang wi' the boy?' (quoth my auntie). 'Come out' (quo' I) 'and I'll tell ye,' which she did. We gaed up the hill a bit, to be sure, as she said, o' the thing I had seen; we saw nought ava, and came back again in an unco way. That vera night granfaither grew ill, which was on a Saturday teen, and he was dead, puir body, or sax o'clock on Monday morning." From the Farm of Killumpha, in Kirkmaiden, comes another kindred episode:--