And the Frenssh lordes there made there othes upon the holy sacrament. And the othes thus done, the Frensshe lordes with theire felauship were brought to the kyngs tents, and there thei eten in the kyngs halle: but in all this tyme thei sawe not the kyng. And when thei had eten, they were departid and delyvered to certen lordes for to in hostage unto the Sonday at the houre after none, as it was accordid whan thei received. And at the houre on Sonday after none, the kyng had a tent pight on an hille bifore the towne, and there he sate in his estate roial, and al his lordis about hym; and than came the Frensshe lordes with iij^{xx} and iiij with them, of the moost sufficient men that were withynne the towne, and to the kyng in his propre persone yelded up the keies of the towne, and there bodies and goodes to the kyngs grace without eny condicion: and this was done the xxij day of Septembre, the yere of oure lord m^{l} iiij^{c} xv. And anon after that, the kyng ostered from thens xxj daies thurgh the realme of Fraunce, fro Harflete toward Caleys; and the Friday, that is to sey the day of the holy seints Crispyn and Crispinian, alle the roial power of Fraunce, excepte the Frenssh kyng, the dolphyn, the duke of Bourgoyne, and the duke of Barre were bifore the kyng in his heigh weie, as he shulde passe to Caleis, faire embatailed in iij batailes, to the nombre of lx m^{l} men of armes, and the fairist armed men that eny man saugh ever in any place. And the kyng seyng wele that thei wolde not suffre hym to passe withouten bataile, seid to his title mayny, 'Sires and felawes, the yonder men letten us of oure wey; and if thei wol com to us, let every man preve hymself a good man this day, and avaunt banere in the best tyme of the yere.' And he rode furth with his basnet upon his hedde, and all other men of armes went upon theire fete a fast paas in holle arraie, an Englisshe myle er thei assemblid. And thrugh the grace of God the kyng made his heigh wey thrugh the thikkest prees of alle the bataile. And there was slayne the duke of Launson, the duke of Braban, the duke of Bare, vj erles, the constable of Fraunce, the seneschall of Henaude, the maister Arblaster, and of other lordes grete plente. And there was take the duke of Orliaunce, the duke of Burbon, the counte of Richmond, the counte Ewe, the marschal Sir Bursequant, and many other lordes and knyghts. And there were slayne of Frensshemen v m^{l}, and of al estats of Englisshemen passid not xxviij persones. And of estats of thenglisshe, the duke of Yorke, therle of Suffolke, ij knyghts, and Davy Game; and of gentilmen no moo. And the xxiiij day of Novembre the kyng with all his prisoners came to London in good prosparite. Also this same yere bigan the general counsell at Custance." NOTE FF. page 103. The arrival of the emperor is differently noticed in the copy in the Cottonian MS.