"The kyng with alle his hoste seiled over the see with ij m^{l} shippis and mo; and the xvj day of August a litle from Harflete he landid: and the Saturday next after thassumpcion of oure lady he leide siege about Harflete, and contynued the sege unto the Sonday next before the fest of seint Michel, upon which Sonday the towne of Harflete was delyvered to the king, that was the xxij day of Septembre. But it is to wite, that on Tuesday bifore, that was the xvij day of Septembre, at xij of the belle wythynne nyght, the lordes that were capteynes and governours of the towne, that is to sey the lord Gaucourt, the lord Tutvill, and mo other lordes, senten out an haraude of armes unto the duke of Clarence, praiyng him at the reverence of God that he wolde send to the kyng, bisechyng hym that he wolde of his high and gracious lordship, graunt them leve to trete with what persones that the kyng wolde assigne to them. And the kyng at the reverence of God, and at there request, assigned therle of Dorset, the lord Fitz Hugh, and S^{r}. Thomas of Erpyngham, to here what thei wolde desire. And thei desired that the kyng wold not werre upon them fro that houre at mydnyght, unto the Sonday next after the fest of seint Michel; and but it were so that thei were rescued by bataile of the Frensshe kyng or with the dolphyn by that day, thei to yelde the towne to the kyng, and thei to have theire lives and goodes. And the kyng sent them worde that if thei wolde delyver the towne on the morwe next after the houre of mydnyght aforseid, without any condicion, he wolde accepte it, and in any other wise he bad them seke no trete. And yet the Frensshe lordes praied oure lordes to biseke the kyng at the reverence of God and of oure lady, that he wolde graunte them that same Tuesday nyght, Wednesday, Thursday, Friday, Saturday, and the Sonday til an houre after none: and in that meane tyme the lordes that were capitayns of the towne, to come to the kyng with xxij knyghts and squyers with them, of the moost sufficient men withyn the towne, and thei to be sworen openly afore alle the people upon Goddis body. But it so were that the Frensshe kyng or the dolphyn rescued them by that Sonday, by the houre of none or anon after none, thei to delyver the towne to the kyng, and alle there bodies and goodes to done with them whatsoever him list, without eny condicion, with that the kyng wolde suffre them to send to the Frensshe kyng viij persones out of the towne, lettyng him wite in what plite thei stond: and they graunted them. And upon the Wednesday by the morowe these lordes comen out of the towne, and xxij knyghts with them; and come the procession solempnely and stately, with xxiiij copis of a sute before Goddis body, with many worshipful lordes, knyghts, and squyers, and other moch multitude of people fro the kings tent, as solempnely done and as stately as any man saugh ever such a thing done bifore that time; but the kyng was not there present.