In this yere, abougte Alhalwen tyme, the kyng with the quene, with other barons and lordes, seyled over the see to the kyng of Fraunce, and dwelled there half yere and more with gret honoure and love, so that he hadde no wil homward; but he was thretned be the co'e counsaill of Engelond that but if he come home here sounne they wolde chesyn them a newe kyng: and there was gret discord, and a rysynge betwen Edward the kynges sone and Richard thanne erle of Worcestre,[8] so that all Engelond was meved to werre; for whiche, a lytel before Whitsonday the kyng come into Engelond, an cam into London, and lay in the bysshopes palys of London besyde Poules, unto the tyme that pees was stablisched thorough alle Engelond. [Footnote 8: Gloucestre _in the Cotton MS._] REX HENRICUS T'CIUS. [1260-1263.] Id'm maior. John Northt'. A^{o}. xlv^{to}. Ric' Pychard. John Tallour. A^{o}. xlvj^{to}.[9] Ric' Walbrooke. [Footnote 9: _See note_ C.] [Sidenote: Note:--That no record makes mention of an earle of Worcester in this time.] This same yere, abought the fest of the traunslacion of seynt Thomas, the kyng with the quene sailled over the see into Fraunce, and the erle of Worcestre[10] deyde. [Footnote 10: Gloucestre _in the Cotton MS._] Th' Fitz Thomas, m'. Philip Walbrok. A^{o}. xlvij^{mo}. Ric' Taillour. [Sidenote: The barons werres.] In this yere began the barons werres, in whiche there were many ful worthy lordes sclayn, and moche myschief and sorwe was that time in Engelond. REX HENRICUS T'CIUS. [1263-1265.] Id'm maior. Robert Mounpylers. A^{o}. xlviij^{o}. Osbert Vynt'. In this yere the town of Northampton was taken, and manye of the men that were founden withinne were sclayn, forasmoche as thei hadde ordeyned wyldefeer for to abrent the citee of London. Also this yere, after the purificacion of oure lady, the kynges litell halle at Westm' with the chaumbre were brent. Also in this yere, at Whitsontyde, there aroos a grete discord betwen the kyng and his barons, and the bysshop of Hereford was taken and lad into Walys into a castell. Also in that discord Elianore the quene was foule repreved and almost sclayn upon London bregge: and after this, a litel before Mighelmesse, the kyng and the quene sailed into Fraunce, to the kynges parlement of Fraunce. Id'm maior. Th' de la Ford. A^{o}. xlix^{o}. Gregor' Rokesley. [Sidenote: A parlement at Redyng.] [Sidenote: Barons werre.] [Sidenote: Bellum de Lewes.] [Sidenote: Stella comata.]