[Sidenote: T'us s'c'i Edward.] [Sidenote: Hoc A^{o} concessit civib' Londo'.] [Sidenote: T're mot'.] This yere the kyng lete translate ayeyne the body of seynt Edward into a precious schryne; and there weren alle the lordes spirutuelx and temporelx of Engelond. And in the xvj day of March the kyng ordeyned that no man schulde gon ought of the citee of London be water no be londe to regrate ony vitaile. Also in this yere after Estren the kyng graunted to the citezens of London alle there liberties and fraunchises. And on the morwe of seynt Lucye the virgyne was gret erthequake aboughte evesong tyme. REX HENRICUS T'CIUS. [1270-1272.] John Adryan, m'. Walter Potter. A^{o}. lv^{to}. John Taillour. In this yere Edwarde the kynges sone, in the feste of Philip and Jacob, tok his vyage into the holy lond with manye othere grete lordes bothe of Engelond and of other londes. Id'm maior. Gregorius Rokesley. A^{o}. lvj^{to}. Herry Waleys. [Sidenote: Bowe stepil fil doun.] [Sidenote: The Sowdon sente l'res to Edward the kynges sone be a Sarasyn, whiche wolde a sclayn the said Edward, whiche Edward strangled the Sarasyn.] In this yere, the V kal. of Feverer', the yere of oure lord a m^{l}clxx, the stepil of the chirch of seynt Marie at the Bowe fel down in Chepe, and perysshed moche peple. And in this yere Edwarde the kynges sone was wounded of a Saresyn at Acres, whiche broughte hym lettres fro the Sowdone, the whiche Sowdone menynge tresone hadde sent the same Sarasyn with the lettres unto the said kynges sone Edward, whiche for hete of the contrey eyre satt on a bedde in his doublet, and opened them. Whiles the lettres weren in redynge, the said Sarasyn, knelynge befor hym, drowe out a knyf yvenymed, and wolde have smyten the sayd S^{r}. Edward in the bely, and failed; but he smot hym in the arm and eft ayeyne in the foot: whiche Saresyn he stranglyd betwen his too handes to the deth; and sithens he was cured therof, blessyd be God. Also in this yere the said S^{r}. Edward comynge hom thorough Fraunce, he dede the tornement at Chalons, whiche was proposed for his distruccion for envye. Sire Wat' Hervy Miles, m'. Robert Milborne. A^{o}. lvij^{o}. Petir Cosyn. [Sidenote: The schirreves were deposyd for takynge mede of the bakers.] These two scherreves were convict before the barons of the Escheker, in the fest of seynt Andrew; forasmoche as they token mede of the bakers of London, and wolde nought leten them be corrected and justified: wherefore they were deposyd of there offices; and in there stedes were seet John Bedle and Richard Parys. And in this yere, on seynt Edmondes day the bisshope, in the yere of oure lorde a m^{l}cclxxij, kyng Herry the thridde deyde, and rially was beryed at Westm'. * * * * *