Produced by David T. Jones, Ross Cooling and the Online Distributed Proofreading Canada Team at http://www.pgdpcanada.net (This file was produced from images generously made available by The Internet Archive/American Libraries.) A LOWDEN SABBATH MORN BY ROBERT LOUIS STEVENSON ILLUSTRATED BY A. S. BOYD [Illustration] A LOWDEN SABBATH MORN [Illustration: THE PRAYER p. 16] A LOWDEN SABBATH MORN BY ROBERT LOUIS STEVENSON ILLUSTRATED BY A. S. BOYD & PUBLISHED AT LONDON BY CHATTO & WINDUS MCMIX First Illustrated Edition published 1898, and a Second Impression in the same year. New Edition in 1907; and with Coloured Frontispiece in 1909. Printed by Ballantyne, Hanson & Co. At the Ballantyne Press, Edinburgh TO THE MEMORY OF ROBERT LOUIS STEVENSON THIS BOOK IS DEDICATED BY THE ILLUSTRATOR A Lowden Sabbath Morn I The clinkum-clank o' Sabbath bells Noo to the hoastin' rookery swells, Noo faintin' laigh in shady dells, Sounds far an' near, An' through the simmer kintry tells Its tale o' cheer. II An' noo, to that melodious play, A' deidly awn the quiet sway-- A' ken their solemn holiday, Bestial an' human, The singin' lintie on the brae, The restin' plou'man. III He, mair than a' the lave o' men, His week completit joys to ken; Half-dressed, he daunders out an' in, Perplext wi' leisure; An' his raxt limbs he'll rax again Wi' painfü' pleesure. IV The steerin' mither strang afit Noo shoos the bairnies but a bit; Noo cries them ben, their Sinday shüit To scart upon them, Or sweeties in their pouch to pit, Wi' blessin's on them. V The lasses, clean frae tap to taes, Are busked in crunklin' underclaes; The gartened hose, the weel-filled stays, The nakit shift, A' bleached on bonny greens for days An' white's the drift. VI An' noo to face the kirkward mile: The guidman's hat o' dacent style, The blackit shoon, we noo maun fyle As white's the miller: A waefü' peety tae, to spile The warth o' siller. VII Our Marg'et, aye sae keen to crack, Douce-stappin' in the stoury track, Her emeralt goun a' kiltit back Frae snawy coats, White-ankled, leads the kirkward pack Wi' Dauvit Groats. VIII A thocht ahint, in runkled breeks, A' spiled wi' lyin' by for weeks, The guidman follows closs, an' cleiks The sonsie missis; His sarious face at aince bespeaks The day that this is. IX And aye an' while we nearer draw To whaur the kirkton lies alaw, Mair neebours, comin' saft an' slaw Frae here an' there, The thicker thrang the gate, an' caw The stour in air. X