Buona pulcella fut Eulalia, bel auret corps, bellezour anima. Voldrent la veintre li deo inimi, voldrent la faire diaule servir. Elle non eskoltet les mals conselliers, qu'elle deo raneiet, chi maent sus en ciel, Ne por or ned argent ne paramenz, por manatce regiel ne preiement. Niule cose non la pouret omque pleier, la polle sempre non amast lo deo menestier. E poro fut presentede Maximiien, chi rex eret a cels dis sovre pagiens El li enortet, dont lei nonque chielt. qued elle fuiet lo nom christiien. Ell' ent adunet lo suon element, melz sostendreiet les empedementz, Qu'elle perdesse sa virginitet: poros furet morte a grand honestet. Enz enl fou la getterent, com arde tost. elle colpes non auret, poro nos coist. A ezo nos voldret concreidre li rex pagiens; ad une spede li roveret tolir lo chief. La domnizelle celle kose non contredist, volt lo seule lazsier, si ruovet Krist. In figure de colomb volat a ciel. tuit orem, que por nos deguet preier, Qued auuisset de nos Christus mercit post la mort et a lui nos laist venir Par souue clementia. LA PASSION DU CHRIST. Christus Jhesus den s'en leved, Gehsesmani vil' es n'anez. toz sos fidels seder rovet, avan orar sols en anet. Grant fu li dois, fort marrimenz. si condormirent tuit ades. Jhesus cum veg los esveled, trestoz orar ben los manded. E dunc orar cum el anned, si fort sudor dunques suded, que cum lo sangs a terra curren de sa sudor las sanctas gutas. Als sos fidels cum repadred, tam benlement los conforted li fel Judas ja s'aproismed ab gran cumpannie dels judeus. Jhesus cum vidra los judeus, zo lor demandet que querent. il li respondent tuit adun 'Jhesum querem _Nazarenum_.' 'Eu soi aquel,' zo dis Jhesus. tuit li felun cadegren jos. terce ves lor o demanded, a totas treis chedent envers. VIE DE SAINT LEGER. Domine deu devemps lauder et a sus sancz honor porter; in su' amor cantomps dels sanz quae por lui augrent granz aanz; et or es temps et si est biens quae nos cantumps de sant Lethgier. Primos didrai vos dels honors quie il auuret ab duos seniors; apres ditrai vos dels aanz que li suos corps susting si granz, et Evvruins, cil deumentiz, qui lui a grand torment occist. Quant infans fud, donc a ciels temps al rei lo duistrent soi parent, qui donc regnevet a ciel di: cio fud Lothiers fils Baldequi. il le amat; deu lo covit; rovat que _litteras_ apresist. [Sidenote: Dialects and Provincial Literatures.]