++YE shall vnderstonde that the moost subtyll & hardyste crafte in makynge of your harnays is for to make your hokis. For whoos makyng ye must haue fetefyles. thyn̄ and sharpe & smalle beten : A semy clam̄ of yren : a bender : a payr of longe & smalle tongys : an harde knyfe somdeale thycke : an anuelde : & a lytyll hamour. ¶ And for smalle fysshe ye shall make your hokes of the smalest quarell nedlys that ye can fyn | de of stele / & in this wyse. ¶ Ye shall put the quarell in a redde charkcole fyre tyll that it be of the same colour that the fyre is. Thenne take hym out and lete hym kele : and ye shal fynde him well alayd for to fyle. Thenne reyse the berde wyth your knyfe / and make the poynt sharpe. Thenne alaye hym agayn : for elles he woll breke in the bendyng. Thenne bende hym lyke to the bende fyguryd herafter in example. And gretter hokes ye shall mabe in the same wyse of gretter nedles : as broderers nedlis : or taylers : or shomakers nedlis spere poyntes / & {9} of shomakers nalles in especyall the beste for grete fysshe. and that they bende atte the poynt whan they ben assayed / for elles they ben not good ¶ Whan the hoke is bendyd bete the hynder ende abrode : & fyle it smothe for fretynge of thy lyne. Thenne put it in the fyre agayn : and yeue it an easy redde hete. Thenne sodaynly quenche it in water : and it woll be harde and stronge. And for to haue knowlege of your Instrumentes : lo theym here in fygure portrayd. [Illustration : ¶ Hamour. Knyfe. Pynsons. Clam̄ Wegge. Fyle. Wreste. & Anuelde.] ++WHan ye haue made thus your hokis : thenne must ye set theym on your lynes acordynge in gretnesse & strength in this wyse. ¶ Ye shall take smalle redde silke. & yf it be for a grete hoke then̄e double it : not twynyd. And elles for sma | le hokys lete it be syngle : & therwyth frette thycke the lyne the | re as the one ende of your hoke shal sytte a strawe brede. Then̄ sette there your hoke : & frette hym wyth the same threde y^e two partes of the lengthe that shall be frette in all. And whan ye co | me to the thyrde parte thenne torne the ende of your lyne aga | yn vpon the frette dowble. & frette it so dowble that other thyr | de parte. Thenne put your threde in at the hose twys or thries & lete it goo at eche tyme rounde abowte the yerde of your hoke. Thenne wete the hose & and drawe it tyll that it be faste. And lo | ke that your lyne lye euermore wythin your hokys : & not with | out. Thenne kytte of the lynys ende & the threde as nyghe as ye maye : sauynge the frette.