++NOw I haue lernyd you to make all your harnays. Here I woll tell you how ye shall angle. ¶ Ye shall angle : vnderstonde that there is .vi. manere of anglyng. That one is at the grounde for the troughte and other fisshe. A nother is at y^e grounde at an arche / or at a stange where it ebbyth and flowyth : for bleke : roche. and darse. The thyrde is wyth a flote for all manere of fysshe. The fourth wyth a menow for y^e troughte wythout plumbe or flote. The fyfth is rennynge in y^t same wyse for roche and darse wyth one or two heeres & a flye. The syxte is wyth a dubbyd hoke for the troughte & graylyng ¶ And for the fyrste and pryncypall poynt in anglynge : kepe y^e euer fro the water fro the sighte of the fysshe : other ferre on the londe : or ellys behynde a busshe that the fysshe se you not. For yf they doo they wol not byte. ¶ Also loke that ye shadow not the water as moche as ye may. For it is that thynge that woll soone fraye the fysshe. And yf a fysshe be afrayed he woll not bi | te longe after. For alle manere fysshe that fede by the grounde ye shall angle for theim to the botom. soo that your hokys shall renne or lye on the grounde. And for alle other fysshe that fede {12} aboue ye shall angle to theym in the myddes of the water or somdeale byneth or somdeale aboue. For euer the gretter fisshe the nerer he lyeth the botom of the water. And euer the smaller fysshe the more he smymmyth aboue. ¶ The thyrde good poynt is whan the fysshe bytyth that ye be not to hasty to smyte nor to late / For ye must abide tyll ye suppose that the bayte be ferre in the mouth of the fysshe / and thenne abyde noo longer. And this is for the groūde. ¶ And for the flote whan ye se it pul | lyd softly vnder the water : or elles caryed vpon the water softly : thenne smyte. And loke that ye neuer ouersmyte the strengthe of your lyne for brekynge. ¶ And yf it fortune you to smyte a grete fysshe wyth a smalle harnays : thenne ye must lede hym in the water and labour him there tyll he be drownyd and ouercome. Thenne take hym as well as ye can or maye. and euer bewaar that ye holde not ouer the strengthe of your lyne. And as moche as ye may lete hym not come out of your lynes ende streyghte from you : But kepe hym euer vnder the rodde / and euermore holde hym streyghte : soo that your lyne may sus | teyne and beere his lepys and his plungys wyth the helpe of your croppe & of your honde.