"Ye'll wonder at me, but I've sat here in the lang fore-nichts dreamin' 'at Joey was a grown man noo, an' 'at I was puttin' on my bonnet to come to the kirk to hear him preach. Even as far back as twenty years an' mair I wasna able to gang aboot, but Joey would say to me, 'We'll get a carriage to ye, mother, so 'at ye can come and hear me preach on "Thou God seest me."' He would say to me, 'It doesna do, mother, for the minister in the pulpit to nod to ony of die fowk, but I'll gie you a look an' ye'll ken it's me.' Oh, Joey, I would hae gien you a look too, an' ye would hae kent what I was thinkin'. He often said, 'Ye'll be proud o' me, will ye no, mother, when ye see me comin' sailin' alang to the pulpit in my gown?' So I would hae been proud o' him, an' I was proud to hear him speakin' o't. 'The other fowk,' he said, 'will be sittin' in their seats wonderin' what my text's to be, but you'll ken, mother, an' you'll turn up to "Thou God seest me," afore I gie oot the chapter.' Ay, but that day he was coffined, for all the minister prayed, I found it hard to say, 'Thou God seest me.' It's the text I like best noo, though, an' when Hendry an' Leeby is at the kirk, I turn't up often, often in the Bible. I read frae the beginnin' o' the chapter, but when I come to 'Thou God seest me,' I stop. Na, it's no 'at there's ony rebellion to the Lord in my heart noo, for I ken He was lookin' doon when the cart gaed ower Joey, an' He wanted to tak my laddie to Himsel. But juist when I come to 'Thou God seest me,' I let the Book lie in my lap, for aince a body's sure o' that they're sure o' all. Ay, ye'll laugh, but I think, mebbe juist because I was his mother, 'at though Joey never lived to preach in a kirk, he's preached frae 'Thou God seest me' to me. I dinna ken 'at I would ever hae been sae sure o' that if it hadna been for him, an' so I think I see 'im sailin' doon to the pulpit juist as he said he would do. I seen him gien me the look he spoke o'--ay, he looks my wy first, an' I ken it's him. Naebody sees him but me, but I see him gien me the look he promised. He's so terrible near me, an' him dead, 'at wen my time comes I'll be rale willin' to go. I dinna say that to Jamie, because he all trembles; but I'm auld noo, an' I'm no nane loth to gang."