"Leeby was saxteen month younger than Joey, an' mair quiet like. Her heart was juist set on helpin' aboot the hoose, an' though she was but fower year auld she could kindle the fire an' red up (clean up) the room. Leeby's been my savin' ever since she was fower year auld. Ay, but it was Joey 'at hung aboot me maist, an' he took notice 'at I wasna gaen out as I used to do. Since sune after my marriage I've needed the stick, but there was days 'at I could gang across the road an' sit on a stane. Joey kent there was something wrang when I had to gie that up, an' syne he noticed 'at I couldna even gang to the window unless Hendry kind o' carried me. Na, ye wouldna think 'at there could hae been days when Hendry did that, but he did. He was a sort o' ashamed if ony o' the neighbours saw him so affectionate like, but he was terrible taen up aboot me. His loom was doon at T'nowhead's Bell's father's, an' often he cam awa up to see if I was ony better. He didna lat on to the other weavers 'at he was comin' to see what like I was. Na, he juist said he'd forgotten a pirn, or his cruizey lamp, or ony thing. Ah, but he didna mak nae pretence o' no carin' for me aince he was inside the hoose. He came crawlin' to the bed no to wauken me if I was sleepin', an' mony a time I made belief 'at I was, juist to please him. It was an awfu' business on him to hae a young wife sae helpless, but he wasna the man to cast that at me. I mind o' sayin' to him one day in my bed, 'Ye made a poor bargain, Hendry, when ye took me.' But he says, 'Not one soul in Thrums 'll daur say that to me but yersel, Jess. Na, na, my dawty, you're the wuman o' my choice; there's juist one wuman i' the warld to me, an' that's you, my ain Jess.' Twa an' twenty years syne. Ay, Hendry called me fond like names, thae no everyday names. What a straucht man he was! "The doctor had said he could do no more for me, an' Hendry was the only ane 'at didna gie me up. The bairns, of course, didna understan', and Joey would come into the bed an' play on the top o' me. Hendry would hae ta'en him awa, but I liked to hae 'im. Ye see, we war long married afore we had a bairn, an' though I couldna bear ony other weight on me, Joey didna hurt me, somehoo. I liked to hae 'im so close to me.