"This is no a maiter I like to speak aboot; na, I dinna care to mention it, but the neighbours is nat'rally ta'en up aboot it, and Chirsty Tosh was sayin' what I would wager 'at Marget hadna sent the minister to hint 'at Davit's bein' overlookit in the invitations was juist an accident? Losh, losh, Jess, to think 'at a woman could hae the michty assurance to mak a tool o' the very minister! But, sal, as far as that gangs, Marget would do it, an' gae twice to the kirk next Sabbath, too; but if she thinks she's to get ower me like that, she taks me for a bigger fule than I tak her for. Na, na, Marget, ye dinna draw my leg (deceive me). Ou, no. . . . "Mind ye, Jess, I hae no desire to be friends wi' Marget. Naething could be farrer frae my wish than to hae helpit in the layin' oot o' Pete Lownie, an', I assure ye, Davit wasna keen to gang to the bural. 'If they dinna want me to their burals,' Davit says, 'they hae nae mair to do than to say sae. But I warn ye, Tibbie,' he says, 'if there's a bural frae this hoose, be it your bural, or be it my bural, not one o' the family o' Lownies casts their shadows upon the corp.' Thae was the very words Davit said to me as we watched the hearse frae the sky-licht. Ay, he bore up wonderfu', but he felt it, Jess--he felt it, as I could tell by his takkin' to drink again that very nicht. Jess, Jess. . . . "Marget's getting waur an' waur? Ay, ye may say so, though I'll say naething agin her mysel. Of coorse am no on equalty wi' her, especially since she had the bell put up in her hoose. Ou, I hinna seen it mysel, na, I never gang near the hoose, an', as mony a body can tell ye, when I do hae to gang that wy I mak my feet my friend. Ay, but as I was sayin', Marget's sae grand noo 'at she has a bell in the house. As I understan', there's a rope in the wast room, an' when ye pu' it a bell rings in the east room. Weel, when Marget has company at their tea in the wast room, an' they need mair watter or scones or onything, she rises an' rings the bell. Syne Jean, the auldest lassie, gets up frae the table an' lifts the jug or the plates an' gaes awa ben to the east room for what's wanted. Ay, it's a wy o' doin' 'at's juist like the gentry, but I'll tell ye, Jess, Pete juist fair hated the soond o' that bell, an' there's them 'at says it was the death o' 'im. To think o' Marget ha'en sic an establishment! . . .