513 V. xxvi. 1. Et diligenter Daniel finem quarti Regni digitos ait pedum esse ejus imaginis, quæ a Nabuchodonosor visa est, in quos venit lapis sine manibus præcisus; et quemadmodum ipse ait: “Pedes, pars quidem aliqua ferrea, et pars aliqua fictilis; quoadusque abscissus est lapis sine manibus, et percussit imaginem in pedes ferreos et fictiles, et comminuit eos usque ad finem.” Post deinde in exsolutione ait: “Et quoniam vidisti pedes et digitos, partem quidem fictilem, partem autem ferream, regnum divisum erit, et a radice ferrea erit in eo, quemadmodum vidisti ferrum commixtum testæ. Et digiti pedum, pars quidem aliqua ferrea, pars autem aliqua fictilis.” Ergo decem digiti pedum, hi sunt decem Reges, in quibus dividetur regnum: ex quibus quidam quidem fortes et agiles, sive efficaces; alii autem pigri et inutiles erunt, et non consentient: quemadmodum et Daniel ait: “Pars aliqua regni erit fortis, et ab ipsa pars erit minuta. Quoniam vidisti ferrum commixtum testæ, commixtiones erunt in semine hominum, et non erunt adjuncti invicem, quemadmodum ferrum non commiscetur cum testa.” Et quoniam finis fiet, inquit: “Et in diebus Regum illorum excitabit Deus cœli Regnum, quod in æternum non corrumpetur, et Regnum ejus alteri populo non relinquetur. Comminuet et ventilabit omnia regna, et ipsum exaltabitur in æternum. Quemadmodum vidisti, quoniam de monte præcisus est lapis sine manibus, et comminuit testam, ferrum, et æramentum, et argentum, et aurum. Deus magnus significavit Regi, quæ futura sunt post hæc: et verum est somnium, et fidelis interpretatio ejus.”—2. Si ergo Deus magnus significavit per Danielem futura, et per Filium confirmavit; et Christus est lapis, qui præcisus est sine manibus, qui destruet temporalia Regna, et æternum inducet, quæ est justorum resurrectio: “Resuscitabit,” ait, “Deus cœli Regnum, quod in æternum nunquam corrumpetur.” See also xxvi. 1. p. 243, note.