Da frewten sich die Reysgeferten, Als sie den Rein[1] da rauschen hörten, 260 Vnd wünschten auff ein newes Glück, Das Glücklich sie der Rein fortschick, Vnd grüssten jhn da mit Trommeten: “Nun han wir deiner hilff von nöten, O Rein, mit deynem hellen fluss 265 Dien du vns nun zur fürdernuss[2]; Las vns geniesen deyner Gunst, Dieweil du doch entspringst bey vns Am Vogelberg bey den Luchtmannen,[3] Im Rheintzierland,[4] von alten anen, 270 Vnd wir dein Thal, dadurch du rinnst, Mit bawfeld zirn, dem schönsten dienst. Schalt[5] diss Wagschiflein nach begeren, Wir wöllen dir es doch verehren. Leyt[6] es gen Strassburg, deine zird, 275 Darfür[7] du gern lauffst mit begird, Weyl es dein strom ziert vnd ergetzt, Gleich wie ein Gstein im Ring versetzt.” Der Rein mocht dis kaum hören auss, Da wund er vmb das schiff sich kraus, 280 Macht vmb die Růder ein weit Rad, Vnd schlůg mit freuden anss gestad, Vnd liess ein rauschen Stimm da hören, Drauss man mocht dise wort erklären: “Frisch dran, jr liebe Eydgenossen,” 285 Sprach er, “frisch dran, seit vnuerdrossen; Also folgt eweren Vorfaren, Die diss thaten vor hundert jaren.[8] Also můss man hie Rhům erjagen, Wann man den Alten will nachschlagen. 290 Von ewerer Vorfaren wegen Seit jr mir wilkumm hier zugegen. Jr sůcht die alt Gerechtigkeit, Die ewer Alten han bereit[9]; Dieselbig will ich euch gern gonnen, 295 Wie es die Alten han gewonnen. Ich weiss, ich werd noch offtmals sehen Solchs von ewern nachkommen gschehen. So erhält man nachbarschafft, Dann je der Schweitzer eygenschafft 300 Ist Nachbaurliche freuntlichkeit Vnd inn der Not standhafftigkeit. Ich hab vil ehrlich leut vnd Schützen, Die auf mich inn Schiff thäten sitzen, Geleit gen Strassburg auff das schiessen, 305 Dafür mit freuden ich thu flisen; Aber keyne hab ich geleit Noch heut des tags[10] mit solcher freud. Fahr fort, fahr fort, lasst euch nichts schrecken, Vnd thůt die lenden daran strecken. 310 Die Arbeit trägt darvon den Sig, Vnd macht, das man hoch daher flig Mit Fama, die Růmgöttin herlich, Dan was gschicht schwärlich, das würd ehrlich. Mit solchen leuten solt man schiffen 315 Durch die Mörwirbeln vnd Mördifen, Mit solchen forcht man kein Meerwunder Und kein wetter, wie sehr es tunder[11]; Mit solchen dörfft man sich vermessen, Das einen fremde fisch nicht fressen, 320 Dann dise alles vberstreitten Durch jr vnuerdrossen arbeyten. Mit disen Knaben solte einer Werden des Jasons Schiffartgmeyner[12] Inn die Jnsul zum Gulden Wjder[13], 325 Da wüsst er, das er käm herwider. Weren dise am Meer gesessen, So lang wer vnersůcht nicht gwesen America, die newe Welt, Dan jr Lobgir het dahin gstellt.[14] 330