"_A pensy ant, right trig and clean, Came ae day whidding o'er the green, Where, to advance her pride, she saw A Caterpillar, moving slaw. 'Good ev'n t' ye, Mistress Ant,' said he; 'How's a' at home? I'm blyth to s' ye!' The saucy ant view'd him wi' scorn, Nor wad civilities return; But gecking up her head, quoth she, 'Poor animal! I pity thee; Wha scarce can claim to be a creature, But some experiment O' Nature, Whase silly shape displeased her eye, And thus unfinished was flung bye. For me, I'm made wi' better grace, Wi' active limbs and lively face; And cleverely can move wi' ease Frae place to place where'er I please; Can foot a minuet or jig, And snoov't like ony whirly-gig; Which gars my jo aft grip my hand, Till his heart pitty-pattys, and-- But laigh my qualities I bring, To stand up clashing wi' a thing, A creeping thing the like o' thee, Not worthy o' a farewell to' ye!' The airy Ant syne turned awa, And left him wi' a proud gaffa._ "_The Caterpillar was struck dumb, And never answered her a mum: The humble reptile fand some pain, Thus to be bantered wi' disdain. But tent neist time the Ant came by, The worm was grown a Butterfly; Transparent were his wings and fair, Which bare him flight'ring through the air. Upon a flower he stapt his flight, And thinking on his former slight, Thus to the Ant himself addrest: 'Pray, Madam, will ye please to rest? And notice what I now advise: Inferiors ne'er too much despise, For fortune may gie sic a turn, To raise aboon ye what ye scorn: For instance, now I spread my wing In air, while you're a creeping thing!'_" --ALLAN RAMSAY. Transcriber's Note: Minor typographical errors have been corrected without note. Punctuation has been normalised. Dialect, informal and variant spellings remain as printed. Hyphenation discrepancies in the illustration captions have been amended to match the main text. End of Project Gutenberg's An Elementary Study of Insects, by Leonard Haseman