“Je veulx que les deux mille quatre cens franks que j’ay donnais a Jène Kenedi luy soyent payez en argent, comme il estoit porté en son premier don, é quoy fesant la pension de Willi Guillaulme Douglas me reviendra, laquelle je donne a Fontenoy pour ces services é despens non recompansez. “Je veulx que les quatre mille esqus de ce banquier soyent sollisitez é repayez, duquel j’ay oublié le nom; mais l’evesque de Glascou s’en resoviendra assez; é si l’assignation premiére venoit à manquer, je veulx qu’il leur en soyt donné une sur les premiers deniers de secondat. “Les dix mille franks que l’ambassadeur avoyt receux pour moy, je veulx qu’ilz soyent employez entre mes serviteurs qui s’en vont à present à scavoir, premier, deux mille franks à Elizabeth Courle; deux mille franks à Basten Pages; deux mille à Marie Pages, ma filleule; mille à Gourgon; mille à Gervays. “Plus, sur les aultres deniers de mon revenu, à Beauregard, mille franks; à Monthay mille franks. “E reste de Secondat et de toutes mes casualitez, je veulx estre employez sinq cens franks à la misericorde des enfans de Reims; à mes escoliers, deux mille franks; aux quatre mandians, la somme qu’il sera nécessaire; à mes executeurs, selon les moyens qui ce trouveront, sinq cens franks aux hospitaulx. “A l’esquier de cuisine Martin, je donne mille franks; mille franks à Hambel, e le laisse à mon cousin de Guise, son parein, a le mettre en quelque lieu en son service. “Je laysse sinq cens franks à Robin Hamilton et prie mon filz le prendre, é Monsieur de Glascou faulte de luy, ou l’evesque de Rosse. “Je laysse à Didier son grefe sous la faveur du roy. “Je donne sinq cens franks à Jean Landere, é prie mon cousin de Guise ou d’Humaine (pour du Maine) le prendre en leur service, é a Messieurs de Glascou et de Rosse qu’ils ayent soing de le voir preveu; je veulx que son père soyt payé de ces gages, et luy laysse sinq cens franks. “Je veulx que mille franks soyent payez à Gourgeon, pour argent et aultres chozes qu’ils m’a fournies en ma nécessité. “E je veulx que si Bourgoin accompli le voiage du vœu qu’il a faict pour moy à S. Nicolas, que quinze franks lui soyent livrés à cet effet. Je laysse selon mon peu de moyen six mille franks à l’evesque de Glascou, troys mille à celuy de Rosse. E je laysse la donaison des alsualities et droicts seigneriaux recelez à mon filleul, filz de M. Duruisseau. “Je donne troys cens franks à Laurents, plus troys cens franks à Suzanne, é laysse dix mille franks entre les quatre parties, qui out esté respondant pour moy é au solliciteur parmy. “Je veulx que l’argent provenant des meubles que j’ay ordonnez estre vendus à Londres soyt pour defroyer le voyage de mes gens jusques en France. “Ma cosche je la laysse pour mener mes filles, é les chevaulx pour les vendre ou aultrement en faire leur commoditez. “Il y a environ cent esqus des gages des années passées deus à Bourgoin, que je veulx luy estre payez.