Fair Janet sat within her bower, Sewing her silken seam, And fain would be at Carterhaugh, Amang the leaves sae green. She let the seam fa' to her foot, The needle to her tae, And she's awa' to Carterhaugh, As quickly as she may. She's prink'd hersell, and preen'd hersell, By the ae light o' the moon, And she's awa to Carterhaugh, As fast as she could gang. She hadna pu'd a red red rose, A rose but barely three, When up and starts the young Tamlane, Says, "Lady, let a-be! "What gars ye pu' the rose, Janet? What gars ye break the tree? Or why come ye to Carterhaugh, Without the leave o' me?" "O I will pu' the flowers," she said, "And I will break the tree; And I will come to Carterhaugh, And ask na leave of thee." But when she cam' to her father's ha', She looked sae wan and pale, They thought the lady had gotten a fright, Or with sickness sair did ail. Janet has kilted her green kirtle A little aboon her knee, And she has snooded her yellow hair A little aboon her bree, And she's awa to Carterhaugh, As fast as she can hie. She hadna pu'd a rose, a rose, A rose but barely twae, When up there started young Tamlane, Says, "Lady, thou pu's nae mae." "Now ye maun tell the truth," she said, A word ye maunna lie; O, were ye ever in haly chapel, Or sained in Christentie?" "The truth I'll tell to thee, Janet, A word I winna lie; I was ta'en to the good church-door, And sained as well as thee. "Randolph, Earl Murray, was my sire, Dunbar, Earl March, was thine; We loved when we were children small, Which yet you well may mind. "When I was a boy just turned of nine, My uncle sent for me, To hunt, and hawk, and ride with him, And keep him companie. "There came a wind out of the north, A sharp wind and a snell, And a dead sleep came over me, And frae my horse I fell; The Queen of Fairies she was there, And took me to hersell. "And we, that live in Fairy-land, Nae sickness know nor pain; I quit my body when I will, And take to it again. "I quit my body when I please, Or unto it repair; We can inhabit at our ease In either earth or air. "Our shapes and size we can convert To either large or small; An old nut-shell's the same to us As is the lofty hall. "We sleep in rose-buds soft and sweet, We revel in the stream; We wanton lightly on the wind, Or glide on a sunbeam. "And never would I tire, Janet, In fairy-land to dwell; But aye, at every seven years, They pay the teind to hell; And I'm sae fat and fair of flesh, I fear 'twill be mysell! "The morn at e'en is Hallowe'en; Our fairy court will ride, Through England and through Scotland baith, And through the warld sae wide, And if that ye wad borrow me, At Miles Cross ye maun bide. "And ye maun gae to the Miles Cross, Between twelve hours and one, Tak' haly water in your hand, And cast a compass roun'."