He has gotten a coat of the even claith, And a pair o' shoon of the velvet green; And till seven years were come and gane, True Thomas on earth was never seen. * * * * * THE ELFIN KNIGHT. The Elfin knight stands on yon hill; (Blaw, blaw, blaw winds, blaw,) Blawing his horn baith loud and shrill, (And the wind has blawn my plaid awa'.) "If I had the horn that I hear blawn, (Blaw, blaw, blaw winds, blaw,) And the bonnie knight that blaws the horn!" (And the wind has blawn my plaid awa'.) She had na sooner thae words said; (Blaw, blaw, blaw winds, blaw,) Than the Elfin knight cam' to her side: (And the wind has blawn my plaid awa'.) "Thou art too young a maid," quoth he, (Blaw, blaw, blaw winds, blaw,) "Married wi' me you ill wad be." (And the wind has blawn my plaid awa'.) "I hae a sister younger than me; (Blaw, blaw, blaw winds, blaw,) And she was married yesterday." (And the wind has blawn my plaid awa'.) "Married to me ye shall be nane; (Blaw, blaw, blaw winds, blaw,) Till ye mak' me a sark without a seam; (And the wind has blawn my plaid awa'.) "And ye maun shape it, knifeless, sheerless, (Blaw, blaw, blaw winds, blaw,) And ye maun sew it, needle-threedless; (And the wind has blawn my plaid awa'.) "And ye maun wash it within a well, (Blaw, blaw, blaw winds, blaw,) Whaur dew never wat, nor rain ever fell, (And the wind has blawn my plaid awa'.) "And ye maun dry it upon a thorn, (Blaw, blaw, blaw winds, blaw,) That never budded sin' Adam was born." (And the wind has blawn my plaid awa'.) "O gin that kindness I do for thee; (Blaw, blaw, blaw winds, blaw,) There's something ye maun do for me. (And the wind has blawn my plaid awa'.) "I hae an acre o' gude lea-land, (Blaw, blaw, blaw winds, blaw,) Between the saut sea and the strand; (And the wind has blawn my plaid awa'.) "Ye'll plough it wi' your blawing horn, (Blaw, blaw, blaw winds, blaw,) And ye will sow it wi' pepper corn, (And the wind has blawn my plaid awa'.) "And ye maun harrow't wi' a single tyne, (Blaw, blaw, blaw winds, blaw,) And shear it wi' a sheep's shank bane; (And the wind has blawn my plaid awa'.) "And bigg a cart o' lime and stane, (Blaw, blaw, blaw winds, blaw,) And Robin Redbreast maun trail it hame, (And the wind has blawn my plaid awa'.) "And ye maun barn it in a mouse-hole, (Blaw, blaw, blaw winds, blaw,) And ye maun thresh it in your shoe sole; (And the wind has blawn my plaid awa'.) "And ye maun winnow it wi' your loof, (Blaw, blaw, blaw winds, blaw,) And ye maun sack it in your glove; (And the wind has blawn my plaid awa'.) "And ye maun dry it, but candle or coal, (Blaw, blaw, blaw winds, blaw,) And ye maun grind it, but quern or mill; (And the wind has blawn my plaid awa'.) "When ye hae done, and finish'd your wark, (Blaw, blaw, blaw winds, blaw,) Then come to me, and ye'se get your sark!" (And the wind has blawn my plaid awa'.)