'Illic _phasianus_, natalis insulae perpessus angustias, principum futurus deliciae, nostros evolabat in orbes. Illic _gallus_, tanquam vulgaris astrologus, suae vocis horologio horarum loquebatur discrimina. Illic _gallus silvestris_, privatioris galli deridens desidiam, peregre proficiscens, nemorales peragrabat provincias. Illic _bubo_, propheta miseriae, psalmodias funereae lamentationis praecinebat. Illic _noctua_ tantae deformitatis sterquilinio sordescebat, ut in ejus formatione Naturam crederes fuisse somnolentam. Illic _cornix_, ventura prognosticans, nugatorio concitabatur garritu. Illic _pica_, dubio picturata colore, curam logices perennebat insomnem. Illic _monedula_, latrocinio laudabili reculas thesaurizans, innatae avaritiae argumenta monstrabat. Illic _columba_, dulci malo inebriata Diones, laborabat Cypridis in palaestra. Illic _corvus_, zelotypiae abhorrens dedecus, suos foetus non sua esse pignora fatebatur, usque dum comperto nigri argumento coloris, hoc quasi secum disputans comprobat. Illic _perdix_ nunc aeriae potestatis insultus, nunc venatorum sophismata, nunc canum latratus propheticos abhorrebat. Illic _anas_ cum _ansere_, sub eodem jure vivendi, hiemabat in patria fluviali. Illic _turtur_, suo viduata consorte, amorem epilogare dedignans, in altero bigamiae refutabat solatia. Illic _psittacus_ cum sui gutturis incude vocis monetam fabricabat humanae. Illic _coturnicem_, figurae draconis ignorantem fallaciam, imaginariae vocis decipiebant sophismata. Illic _picus_, propriae architectus domunculae, sui rostri dolabro clausulam fabricabat in ilice. Illic _curruca_, novercam exuens, materno pietatis ubere alienam cuculi prolem adoptabat in filium; quae tamen capitali praemiata stipendio, privignum agnoscens, filium ignorabat. Illic _hirundo_, a sua peregrinatione reversa, sub trabe nidi lutabat hospitium. Illic _philomena_, deflorationis querelam reintegrans, harmoniaca tympanizans dulcedine, puritatis dedecus excusabat. Illic _alauda_, quasi nobilis citharista, non studii artificio, sed Naturae magisterio, musicae praedocta scientiam, citharam praesentabat in ore.... Haec animalia, quamvis illic quasi allegorice viverent, ibi tamen esse videbantur ad litteram.'