32. Why hate ye the gospell to be preched; sith ye be so 135 moche holde thereto? For ye winne more by yere with _In principio_, than with all the rules that ever youre patrons made. And, in this, minstrels been better than ye. For they contraryen not to the mirthes that they maken; but ye contraryen the gospell bothe in worde and dede. 140 33. Frere, whan thou receivest a peny for to say a masse, whether sellest thou goddes body for that peny, or thy prayer, or els thy travail? If thou sayest thou wolt not travaile for to saye the masse but for the peny, +than certes, if this be soth, than thou lovest to littel mede for thy soule. And if thou sellest 145 goddes body, other thy prayer, than it is very symony; and art become a chapman worse than Judas, that solde it for thirty pens. 34. Why wrytest thou hir names in thy tables, that yeveth thee moneye; sith god knoweth all thing? For it semeth, by thy 150 wryting, that god wolde not rewarde him but thou wryte him in thy tables; god wolde els forgetten it. 35. Why berest thou god in honde, and sclaundrest him that he begged for his mete; sith he was lord over all? For than hadde he ben unwyse to have begged, and no nede therto. 155 36. Frere, after what law rulest thou thee? Wher findest thou in goddes law that thou shuldest thus begge? 37. What maner men nedeth for to begge? Of whom oweth suche men to begge? Why beggest thou so for thy brethren? 160 If thou sayest, for they have nede; than thou doest it for the more perfeccion, or els for the leest, or els for the mene. If it be the moost perfeccion of all, than shulde al thy brethren do so; and than no man neded to begge but for him-selfe, for so shuld no man begge but him neded. And if it be the leest perfeccion, why 165 lovest thou than other men more than thy-selfe? For so thou art not well in charitè; sith thou shuldest seke the more perfeccion after thy power, livinge thy-selfe moost after god; and thus, leving that imperfeccion, thou shuldest not so begge for hem. And if it is a good mene thus to begge as thou doest, than shuld no man 170 do so but they ben in this good mene; and yet such a mene, graunted to you, may never be grounded in goddes lawe; for than both lered and lewed that ben in mene degrè of this worlde shuld go aboute and begge as ye do. And if all suche shuld do so, certes, wel nigh al the world shuld go aboute and begge as 175 ye do: and so shulde there be ten beggers agaynst oon yever. 38. Why procurest thou men to yeve thee hir almes, and sayest it is so meedful; and thou wilt not thy-selfe winne thee that mede?