Omnibus ad quos hoc præsens scriptum peruenerit, Ioh[=a]nes de Bromley miles, capitaneus generalis de Dampfront, senescallus & magnus constabularius de Bosseuile le Rosse & March ibidem, salutem. Sciatis quòd pro bono & fideli seruitio quod dilectus consanguineus meus Gualterus de Audeley mihi fecerit, tam infra regnum Angliæ quàm extra, & præcipuè contra Francos: dedisse & concessisse, & hac præsenti charta mea confirmasse eidem Gualtero vnum annualem redditum viginti librarum, exeuntem de manerio meo de Bromley, & omnibus alijs terris & tenementis meis infra regnum Angliæ, vna cum herbagio pro quatuor equis habendo infra boscos meos de Bromley & Willoughbridge, & octo carucatis foeni capiendis infra prata mea de Shurlebrooke & Foordsmedo annuatim, durante tota vita prædicti Gualteri, in festo sancti Iacobi apostoli. Et si contingat prædictum annualem redditum, a retrò fore in aliquo festo, durante termino prædicto; tunc bene licebit eidem Gualtero, in manerio meo, & omnibus alijs terris meis prædictis distringere, & districtiones inde captas penes se retinere, quousq; de redditu prædicto, vna cum arreragijs (si quæ fuerint) plenariè fuerit persolutum & satisfactum. Et vlteriùs volo, quòd prædictus Gualterus habebit liberum egressum & regressum cum equis suis prædictis, & ad asportandum foenum predict[=u], quandocunq; voluerit, per omnes semitas & vias, sine aliqua contradictione mei prædicti Iohannis, aut hæredum meorum aliquali. Reddendo inde mihi ipsi Gualtero annuatim in festo sancti Georgij martyris, si tunc fuerim infra regnum Angliæ, vnum par calcarium deauratorum, pro omnibus. Et etiam volo & concedo quòd prædictus Gualterus liber sit, durante tota vita sua, ad volandum, venandum, piscandum, & alias commoditates percipiendum, tam infra manerium meum de Bromley quàm in omnibus alijs manerijs, terris, & tenementis meis infra regnum Angliæ, sine aliqua contradictione vel impedimento mei præfati Iohannis de Bromley militis, hæredum, aut assignatorum meorum aliquali. Et vt fidele testimonium præsentibus habeatur, sigillum meum apposui: hijs testibus Roberto de Bruyn milite, Iohanne de Holland, Gulihelmo de Brereton, Richardo le Greuill, Iohanne de Egerton, Richardo le Beston, Thoma le Creu, & alijs. Datum apud Dampfront prædicto, 12 die mensis Augusti, anno regni regis Henrici quinti post conquestum sexto.