Confessio Amantis; Or, Tales of the Seven Deadly Sins

Name: Confessio Amantis; Or, Tales of the Seven Deadly Sins
Author: Gower, John

Gower, John

Christian ethics -- Poetry; Christian poetry, English (Middle); Courtly love -- Poetry; Love poetry, English (Middle)

And ryht of such a maner kinde    1360
Ther be lovers, that thogh thei have
Of love al that thei wolde crave,
Yit wol thei grucche be som weie,
That thei wol noght to love obeie
Upon the trowthe, as thei do scholde;
And if hem lacketh that thei wolde,
Anon thei falle in such a peine,
That evere unbuxomly thei pleigne
Upon fortune, and curse and crie,
That thei wol noght here hertes plie    1370
To soffre til it betre falle.
Forthi if thou amonges alle
Hast used this condicioun,
Mi Sone, in thi Confessioun
Now tell me pleinly what thou art.

Mi fader, I beknowe a part,
So as ye tolden hier above
Of Murmur and Compleignte of love,
That for I se no sped comende,
Ayein fortune compleignende    1380
I am, as who seith, everemo:
And ek fulofte tyme also,
Whan so is that I se and hiere
Or hevy word or hevy chiere
Of my lady, I grucche anon;
Bot wordes dar I speke non,
Wherof sche myhte be desplesed,
Bot in myn herte I am desesed:
With many a Murmur, god it wot,
Thus drinke I in myn oghne swot,    1390
And thogh I make no semblant,
Min herte is al desobeissant;
And in this wise I me confesse
Of that ye clepe unbuxomnesse.
Now telleth what youre conseil is.

Mi Sone, and I thee rede this,
What so befalle of other weie,
That thou to loves heste obeie
Als ferr as thou it myht suffise:
For ofte sithe in such a wise    1400
Obedience in love availeth,
Wher al a mannes strengthe faileth;
Wherof, if that the list to wite
In a Cronique as it is write,
A gret ensample thou myht fynde,
Which now is come to my mynde.

Public-domain text, read in full here on John Shaqi.

Reviews

No reviews yet

Be the first to share your thoughts on this work.

Join the Discussion

Join the discussion

Sign in to leave a comment or review.

Sign InorCreate an account