“Ye see,” replied David, “we hae verra little hoose-room i’ this bit cot; for, excep this kitchen, we hae but the ben whaur Janet and me sleeps; and sae last year I spak’ to the laird to lat me hae muckle timmer as I wad need to big a kin’ o’ a lean-to to the house ahin’, so ‘at we micht hae a kin’ o’ a bit parlour like, or rather a roomie ‘at ony o’ us micht retire till for a bit, gin we wanted to be oor lanes. He had nae objections, honest man. But somehoo or ither I never sat han’ till’t; but noo the wa’s maun be up afore the wat weather sets in. Sae I’se be at it the morn, an’ maybe ye’ll len’ me a han’, Mr. Sutherlan’, and tak’ oot yer wages in house-room an’ firin’ efter it’s dune.” “Thank you heartily!” said Hugh; “that would be delightful. It seems too good to be possible. But will not wooden walls be rather a poor protection against such winters as I suppose you have in these parts?” “Hootoot, Mr. Sutherlan’, ye micht gie me credit for raither mair rumgumption nor that comes till. Timmer was the only thing I not (needed) to spier for; the lave lies to ony body’s han’—a few cart-fu’s o’ sods frae the hill ahint the hoose, an’ a han’fu’ or twa o’ stanes for the chimla oot o’ the quarry—there’s eneuch there for oor turn ohn blastit mair; an’ we’ll saw the wood oorsels; an’ gin we had ance the wa’s up, we can carry on the inside at oor leisur’. That’s the way ‘at the Maker does wi’ oorsels; he gie’s us the wa’s an’ the material, an’ a whole lifetime, maybe mair, to furnish the house.” “Capital!” exclaimed Hugh. “I’ll work like a horse, and we’ll be at it the morn.” “I’se be at it afore daylicht, an’ ane or twa o’ the lads’ll len’ me a han’ efter wark-hours; and there’s yersel’, Mr. Sutherlan’, worth ane an’ a half o’ ordinary workers; an’ we’ll hae truff aneuch for the wa’s in a jiffey. I’ll mark a feow saplin’s i’ the wud here at denner-time, an’ we’ll hae them for bauks, an’ couples, an’ things; an’ there’s plenty dry eneuch for beurds i’ the shed, an’ bein’ but a lean-to, there’ll be but half wark, ye ken.”