30. In confesso autem est apud Theologos et Philosophos, quod ex commixtione hominis cum Dæmone aliquoties nascuntur homines, et tali modo nasciturum esse Antichristum opinantur nonnulli Doctores: Bellarm. lib. 1, de Rom. Pont., cap. 12; Suarez, tom. 2, disp. 54, sec. 1.; Maluend., de =Antichr.=, l. 2., c. 8. Immo observant, quod, qui gignuntur ab hujusmodi Incubis, naturali causa etiam evenit, ut nascantur grandes, robustissimi, ferocissimi, superbissimi, ac nequissimi, ut scripsit Maluenda, =loc. cit.=, =§ Ad illud=; et hujus rationem recitat ex Vallesio Archia. Reggio. =Sac. Philosoph.=, c. 8., dicente quod Incubi =summittant in uteros non qualecumque, neque quantumcumque semen, sed plurimum, crassissimum, calidissimum, spiritibus affluens et seri expers. Id vero est eis facile conquirere, deligendo homines calidos, robustos, et abondantes multo semine, quibus succumbant, deinde et mulieres tales, quibus incumbant, atque utrisque voluptatem solito majorem afferendo, tanto enim abundantius emittitur semen, quanto cum majori voluptate excernitur.= Hæc Vallesius. Confirmat vero Maluenda supradicta, probando, ex variis et classicis Auctoribus, ex hujusmodi concubitu natos: Romulum ac Remum, Liv. decad. 1; Plutarch., =in Vit. Romul. et Parallel.=; Servium Tullium, sextum regem Romanorum, Dionys. Halicar., lib. 4, Plin., lib. 36., c. 27; Platonem Philosophum, Laer. l. 9. =de Vit. Philos.=; D. Hyeron., =l. 1. Controvers. Jovinian.=; Alexandrum Magnum, Plutarch., =in Vit. Alex. M.=; Quint. Curt., l. 4, =de Gest. Alex. M.=; Seleucum, regem Syriæ, Just., =Hist.=, l. 15; Appian., =in Syriac.=; Scipionem Africanum Majorem, Liv., decad. 3, lib. 6; Cæsarem Augustum Imperatorem, Sueton., =in Octa.=, c. 94; Aristomenem Messenium, strenuissimum ducem Græcorum, Strabo, =de Sit. Orb.=, lib. 8; Pausan., =de Rebus Græcor.=, lib. 3; et Merlinum, seu Melchinum Anglicum ex Incubo et Filia Caroli Magni Moniali, Hauller, volum. 2, Generat. 7, quod etiam de Martino Luthero, perditissimo Heresiarcha scribit Cochlæus apud Maluendam, =de Antich.=, lib. 2, c. 6, =§ Cæterum=.