++The caumberlayne muste be dylyge{n}t & clenly in his offyce, with his heed kembed, & so to his souerayne that he be not recheles, & se that he haue a clene sherte, breche, petycote, and doublet / tha{n} brusshe his hosen within & without, & se his shone & slyppers be made clene / [a] & at morne whan your souerayne wyll aryse, warme his sherte by the fyre / & se ye haue a fote shete made in this maner. Fyrst set a chayre by the fyre with a cuysshen, an other vnder his fete / tha{n} sprede a shete ouer the chayre, and se there be redy a kerchefe [Fol. B 5.] and a combe / than [b] warme his petycote, his doublet, and his stomachere / [c] & than put on his hosen & his shone or slyppers, than stryke vp his hosen manerly, & tye them vp, than lace his doublet hole by hole, & laye the clothe aboute his necke & kembe his hede / than loke ye haue a basyn, & an ewer with warme water, and a towell, and wasshe his handes / than knele vpon your knee, & aske your souerayne what robe he wyll were, & brynge him such as your souerayne co{m}mau{n}deth, & put it vpon hym; than doo his gyrdell aboute hym, & take your leue manerly, & [d] go to the chyrche or chapell to your soueraynes closet, & laye carpentes & cuysshens, & lay downe his boke of prayers / than drawe the curtynes, and take your leue goodly, & go to youre soueraynes chambre, & cast all the clothes of his bedde, & bete the feder bedde & the bolster / but loke ye waste no feders; than shall the blankettes, & se the shetes be fayre & swete, or elles loke ye haue clene shetes / than [e] make vp his bedde manerly, than lay the hed shetes & the pyllowes / than take vp the towel & the basyn, & laye carpentes aboute the bedde, or wyndowes & cupbordes layde with carpettes and cuysshyns. Also loke there be a good fyre brennynge bryght / & [f] se the hous of hesement be swete & clene, & the preuy borde couered with a grene clothe and a cuysshyn / tha{n} se there be blanked, donne, or cotton, for your souerrayne / & [g] loke ye haue basyn, & euer with water, & a towell for your souerayne / than take of his gowne, & brynge him a mantell to kepe hym fro colde / than brynge hym to the fyre, & take of his shone & his hosen; than take a fayre kercher of reynes / & [h] kembe his heed, & put on his kercher and his bonet / than sprede downe his bedde, laye the heed shete and the pyllowes / & whan your souerayne is to bedde [Fol. B 5b.] drawe the curtynes / than se there be morter or waxe or perchoures be redy / than dryue out dogge or catte, & loke there be basyn and vrynall set nere your souerayne / than take your leue manerly that your souerayne may take his rest meryly. ¶ Here endeth of the chaumberlayne.