¶ And also fysike for-bedes hit, And sais þ{o}u may be choket at þ{a}t byt; Yf hit go þy wrang throte into, And stoppe þy wynde, þ{o}u art fordo. 100 ¶ Ne telle þ{o}u neu{er} at borde no tale To harme or shame þy felawe i{n} sale; For if he then w{i}t{h}holde his methe[8], Eftsons he wyll{e} forcast þi dethe. 104 ¶ Where-ser{e} þ{o}u sitt at mete in borde, Avoide þe cat at on bar{e} worde For yf þ{o}u stroke cat oþ{er} dogge, Þ{o}u art lyke an ape teyȝed w{i}t{h} a clogge. 108 ¶ Also {es}chewe, w{i}t{h}-outen stryfe, To foule þe borde clothe w{i}t{h} þi knyfe; Ne blow not on þy drynke ne mete, Neþ{er} for colde, neþer for hete; 112 ¶ W{i}t{h} mete ne bere þy knyfe to mowthe, Wheþ{er} þ{o}u be sett be strong or couthe; Ne w{i}t{h} þo borde clothe þi tethe þ{o}u wype, [Fol. 14.] Ne þy nyen þ{a}t rennen rede, as may betyde. 116 ¶ Yf þ{o}u sitt by a ryȝht good mañ, Þis lessoñ loke þou þenke apoñ: Vndur his theȝghe þy kne not pit, Þ{o}u ar full{e} lewed yf þ{o}u dose hit. 120 ¶ Ne bacwarde sittande gyf noȝt þy cupe, Noþ{er} to drynke, noþ{er} to suppe; Bidde þi frende take cuppe and drynke, Þ{a}t is holden an-honest thyng. 124 ¶ Lene not on elbowe at þy mete, Noþ{er} for colde ne for hete; Dip not þi thombe þy drynke i{n}to, Þ{o}u art vncurtayse yf þ{o}u hit do; 128 ¶ In salt saler yf þ{a}t þ{o}u pit Oþ{er} fisshe or flesshe þ{a}t me{n} may wyt, Þ{a}t is a vyce, as me{n} me telles, And gret wonder h{i}t most be elles. 132 ¶ After mete when þ{o}u shalt wasshe, Spitt not in basyn, ne wat{er} þ{o}u dasshe; Ne spit not lorely, for no kyn mede, Be-fore no mo{n} of god for drede. 136 ¶ Who so eu{er} despise þis lessoun ryȝt, At borde to sitt he hase no myȝt. Here endys now our{e} fyrst talkyng, Crist graunt vs alle his der{e} blessyng! 140 ¶ Her{e} endith{e} þe [first] boke of curtasye.