Atween thir twa a vow was made, 'Twas made full solemnlie, That or three years were come and gane, Weel married they should be. He hadna been in's ain countrie 45 A twelvemonth till an end, Till he's forced to marry a duke's daughter, Or than lose a' his land. "Ochon, alas!" says young Bekie, "I kenna what to dee; 50 For I canna win to Burd Isbel, And she canna come to me." O it fell out upon a day Burd Isbel fell asleep, And up it starts the Billy Blin, 55 And stood at her bed feet. "O waken, waken, Burd Isbel; How can ye sleep so soun'; When this is Bekie's wedding day, And the marriage gaing on? 60 "Ye do ye till your mither's bower, As fast as ye can gang; And ye tak three o' your mother's marys, To haud ye unthocht lang. "Ye dress yoursel i' the red scarlet, 65 And your marys in dainty green; And ye put girdles about your middle Wad buy an earldome. "Syne ye gang down by yon sea-side, And down by yon sea-strand; 70 And bonny will the Hollans boats Come rowin' till your hand. "Ye set your milk-white foot on board, Cry, 'Hail ye, Domine!' And I will be the steerer o't, 75 To row you o'er the sea." She's ta'en her till her mither's bower, As fast as she could gang; And she's ta'en twa o' her mither's marys, To haud her unthocht lang. 80 She's drest hersel i' the red scarlet, Her marys i' the dainty green; And they've put girdles about their middle Would buy an earldome. And they gaed down by yon sea-side, 85 And down by yon sea-strand; And sae bonny as the Hollans boats Come rowin' till their hand. She set her milk-white foot on board, Cried, "Hail ye, Domine!" 90 And the Billy Blin was the steerer o't, To row her o'er the sea. Whan she cam to young Bekie's gate, She heard the music play; And her mind misgae by a' she heard, 95 That 'twas his wedding day. She's pitten her hand in her pocket, Gi'en the porter markis three; "Hae, take ye that, ye proud porter, Bid your master speake to me." 100 O whan that he cam up the stair, He fell low down on his knee: He hail'd the king, and he hail'd the queen, And he hail'd him, young Bekie. "O I have been porter at your gates 105 This thirty years and three; But there are three ladies at them now, Their like I did never see.