ha’e been able to drop a hint in the richt place that has brocht to nought some crafty scheme o’ the persecutors and saved the life o’ mair than ane hill-man. If ye like to put it that way, I rin wi’ the hare and hunt wi’ the hounds. I’m hand in glove, to a’ ootward seeming, wi’ the persecutors themselves. I foregather wi’ sodgers in roadside inns, and it’s marvellous hoo a pint or twa o’ ’tippenny’ and a truss o’ Virginia weed will loosen their tongues and gaur them talk. I’ve listened quately, and mony a time I’ve let fa’ a remark that mak’s them believe that a’ my sympathies are wi’ them and that I’m no’ in wi’ the Covenanters ava. As a matter o’ solid fact, I am sae weel thocht o’ by men sic as Sir Robert Grier, Dalzell himsel’ and Claver’se, that mair than aince I ha’e been sent by them on special commissions to find things oot; and I’ve come back and I’ve tellt them what they wanted to ken, and riding hell for leather they’ve gane off wi’ their dragoons to some wee thackit cottage on the moors. But they’ve never caught the bird they were after. Somebody--maybe it was me, I’m no’ sayin’--had drapped a timely warnin’; and though I tellt the persecutors nae lee, I ha’e mair than aince gi’en them cause to remember that truth lies at the bottom o’ a very deep well. That’s my story. I’m a spy, if ye like--an ugly word, but I ha’e na man’s blood upon my haun’s or on my conscience. And it’s dangerous wark, as you may weel ken. Some day ane or other o’ my schemes will gang agley, and the heid and haun’s, and maybe the tree-leg as weel, o’ Hector the packman will decorate a spike on Devorgilla’s brig at Dumfries. I wadna muckle mind; for life is sometimes a weary darg, but I’d like, afore that day comes, tae ha’e feenished my _magnum opus_. I maun really lay masel’ on and get it begun. It would be a monument by which I micht be remembered.