Ia po, olelo aku la o Kila i kona mau makuahine: “E ola o Umalehu ma, no ka mea, o ko lakou hoonoho ana ia’u ma Waipio nei, oia ka mea i ola ai ko oukou pololi, ina paha ma ka moana ko lakou hoolei ana ia’u ina hoi paha aole e loaa wahi ai ia oukou; ko’u manao e ola lakou la.” Ma keia olelo a Kila i kona mau makuahine, aole i maliu aku kona mau makuahine mamuli o kana olelo kaua, ua holo ko laua manao ma ka make o ka laua mau keiki. Ike maopopo aku la o Kila, ua wela ka inaina o kona mau makuahine, nolaila, waiho iho la o Kila i kona manao pela i loko ona, aia a hiki i ka wa e kaiia mai ai kona mau kaikuaana i mua o ka lele, alaila, hai ae oia i kona manao huna. A ma kekahi la ae, komo ae la na ’lii i loko o ka heiau, a laweia mai la o Umalehu ma a hiki i ke kumu o ka lele, ia manawa, ua paa kona mau kaikuaana i ka pouamanuia. I ka manawa i hoomaka ia ai e pepehi o Umalehu ma, ia manawa komo pu aku la o Kila ma kahi i manao ia ai e pepehi kona mau kaikuaana, me ka i aku: “Owau mua ke make, a mahope ae o’u mau kaikuaana.” A ike aku la kona mau makuahine, ua oi aku ke aloha o Kila i kona mau kaikuaana, nolaila, hooki ae la o Hooipoikamalanai ma i ko laua manao e make ka laua mau keiki. MOKUNA IX. KA NOHO ANA O HOOIPOIKAMALANAI MA WAIPIO, A ME KA HOI ANA I KAUAI. Noho iho la o Hooipoikamalanai ma me kana mau keiki ma Waipio a nui na la; a hiki i ka manawa i ea ae ai ka ai o na aina a pau, alaila hoi aku la lakou i Kauai. Hooponopono hou ae la o Kila me kona mau kaikuaana a me ko lakou mau makuahine i ka noho ana o ka aina. Aka, o ka manao o Hooipoikamalanai ma, e noho no o Kila e like me ka Moikeha kauoha, o Kila no maluna o kona mau kaikuaana, a o na kaikuaana no na noho hale. Ma ia manao o na makuahine, aole pela ko Kila manao. O ko Kila manao, o na makuahine no maluna o ka aina, a o kana mau keiki no na noho hale, ku kaawale ae no o Kila, no ka mea, ua pono no o Kila i kona aina o Waipio. A no ka like ole o ko Kila manao me ko na makuahine, nolaila, noho iho la o Hooipoikamalanai ma i alii no Kauai, a hiki i ka make ana. A o Kila hoi, hoi aku la oia i Waipio me Kunaka, kona makua hanai. A make aku la o Hooipoikamalanai laua o Hinauu, a koe iho la na keiki. Aka, noho alii iho la na keiki mahope iho o ka make ana o na makuahine. Ia manawa, kipi ae la o Keoloewa, kekahi alii o Kauai i na keiki a Moikeha, a lanakila ae la o Keoloewa, nele iho la na keiki i ka aina ole, lilo ae la ia Keoloewa. Mahope iho o ia manawa, kii aku la o Keoloewa ia Kila i Hawaii ma Waipio e hoi i alji no Kauai; aka, he mea pono no ia i ko Kunaka manao, nolaila, hoi aku la o Kila me Keoloewa, a noho iho la i alii nui no Kauai, a o Keoloewa no kona kuhina. I ka manawa a Kila i noho hou ai i alii no Kauai, aole i liuliu, hiki mai o Laamaikahiki mai Tahiti mai, o ka lua ia o ko Laamaikahiki hiki ana ma Hawaii nei. KA HOLO ALUA ANA MAI O LAAMAIKAHIKI.