A pau keia mau kamailio a laua, kauoha aku la o Liloa ia Akahiakuleana: “I noho oe, a i hanau he keiki kane, e kapa iho oe i kona inoa o Umi. A i hanau he kaikamahine, kapa iho oe ma kou aoao.” I mai la o Akahiakuleana ia Liloa: “Heaha kau hoailona e haawi mai ai, i maopopo na ke ’lii keia keiki?” A lohe o Liloa, haawi mai la ia i kona malo a me kona niho palaoa, a me ka laau palau. I mai la o Liloa ia Akahiakuleana: “Eia na hoailona o ka kaua keiki; a hiki i kona wa nui, e haawi aku oe i keia mau mea nona.” Ae aku la o Akahiakuleana, lalau aku la ia, a haawi aku la i kana kauwa wahine, nana e malama ia mau mea. Alaila, hele aku la o Liloa a hipuupuu i ka laui i malo nona. A hume iho la o Liloa i ka malo laui, a hoi aku la i kona hale noho. A hiki o Liloa i ka hale, olelo mai la kona poe kanaka ia ia: “He malo maoli hoi kou e Liloa i hele aku nei, eia ka he malo laui kou i keia wa.” Malaila o Liloa i noho iho ai a pau ka hoomahanahana ana o kona heiau, hoi mai la oia i Waipio, i kona wahi noho mau. MOKUNA II. KA HANAU ANA O UMI. Noho iho la o Akahiakuleana me ka hapai ia Umi. Ma keia hapai ana, manao no ke kane i ka ili, nana no keia keiki e hapai nei. Nolaila malama iho la i kana wahine, aole oia i ike na Liloa. A hiki i ka wa i hanau ai o Akahiakuleana, i ke keiki, kapa iho la ia i kona inoa o Umi; hanai iho la kona makuahine ia ia a nui. Ia wa hoomaka o Umi e kalohe, a e lealea me na keiki e ae. He mea mau ia Umi ka hele e paani me kamalii, a pau ka paani ana, hoi mai la me ia lehulehu kamalii, a ka hale, haawi aku la i kahi ai a pau loa, a hoi mai la ke kane a kona makuahine, huhu iho la ia ia, me ka pepehi; pela no ka hana mau a kona makuakane a loihi na la i hala. Nolaila, ua pono ole ko ka makuahine manao, a ua kaumaha loa, i keia hana ino i kana keiki ia Umi. Nolaila, ninau malu o Umi i kona makuahine: “Aole anei o’u makuakane e ae?” I mai kona makuahine, o Akahiakuleana: “He makuakane kou aia i Waipio, o Liloa kona inoa.” I aku o Umi: “E hele paha wau e ike i ko’u makuakane?” I mai ka makuahine: “Ae, e hele oe.” Mahope o laila, noho hou iho la lakou, a pepehi hou ka makuakane hanai ia Umi. Alaila, pane aku o Akahiakuleana i ke kane: “E kuu kane, aole nau ke keiki au e pepehi mai nei!” I mai la ke kane me ka leo huhu inoino loa: “A nawai kau keiki, na Liloa?” I aku ka wahine: “Ae, na Liloa ka’u keiki, i lohe oe.” Olelo mai ke kane: “Auhea na hoike e lilo ai ke keiki na Liloa?” Alaila, kahea aku la o Akahiakuleana i kana kauwa wahine, e lawe mai i na mea a Liloa i waiho ai no Umi. A lawe ia mai la ia mau mea a kona alo, i aku ka wahine: “Eia ka hoike.” A ike iho la ke kane i keia mau mea, pau ae la kona kanalua, maopopo iho la ia ia, na Liloa ke keiki o Umi.