A mahope o keia mau mea a pau loa, olelo aku la o Akahiakuleana i kana keiki o Umi: “Eia ka malo o Liloa, e hume oe a paa, eia ka palaoa, e lei oe, eia ka laau palau, ma ko lima e paa ai. Nolaila, ke iho nei oe i Waipio e ike i ko makuakane, e hoolohe pono oe. I kou hiki ana i lalo o ka pali o Waipio, hele aku oe a au i ka muliwai, a kau ma kela kapa, a ike aku oe i ka hale e ku mai ana, e huli mai ana ke alo i kou alo, o ko Liloa hale no ia. Mai komo oe ma ka puka pa, aka, e pii aku oe maluna o ka pa; mai komo oe ma ka puka maoli, aka, e komo ae oe ma ka puka pakaka. A hike oe, nana pono aku oe i ka elemakule e kahili ia ana, oia no o Liloa, kou makuakane, ka’u kane i loaa ai oe. E hele oe a noho i luna o kona uha. A i ninau mai i kou inoa, hai aku oe o Umi.” A pau ka olelo ana a Akahiakuleana ia Umi, i aku la ia ia Omaokamau: “E iho oe me ke keiki, a nau e paa aku ka laau palau a Liloa; e malama pono oe i ka laau a Liloa.” A hiki mai la laua i Waipio, ma Koakea, halawai laua me kekahi keiki, me Piimaiwaa. Ninau mai la o Piimaiwaa ia laua: “E hele ana olua i hea?” I aku laua: “I Waipio.” Alaila, olelo aku la o Umi ia Piimaiwaa: “I keiki hookama oe na’u?” Ae mai la o Piimaiwaa: “Ae.” Hele aku la lakou a hiki i ka muliwai o Waipio, oia o Wailoa, au aku la, a kau ma kela aoao, nana aku la lakou, e ku mai ana ka hale o Liloa. A kokoke lakou i ka hale o Liloa, olelo aku o Umi ia Omaokamau a me Piimaiwaa: “E noho olua ianei, e hele au i o Liloa ala; ina i hele au a i make, e hoi no olua ma kahi a kakou i hele mai nei; aka hoi, i ola mai au, ola kakou.” A pau kana olelo ana, hele aku la ia a pii maluna o ka pa laau o ko Liloa hale noho, a komo aku la ma ka puka pakaka o ka hale. A ike mai la na ilamuku o Liloa, ua laa ke keiki no ka pii ana maluna o ka pa laau o ko Liloa hale, kahi kapu o Liloa, alualu mai la na ilamuku e make o Umi, aka, pii aku la o Umi a noho i luna o na uha o Liloa. Wehe ae la o Liloa i kona mau uha haule iho la o Umi i lalo; a haule o Umi i lalo, ike iho la o Liloa i ka niho palaoa ma ko Umi ai, a me kona malo ma ko Umi hope. Ninau aku la o Liloa: “Owai kou inoa?” I mai la ke keiki: “O Umi au.” Alaila lalau iho la o Liloa ia Umi, a honi iho la me ka hii i luna o kona mau uha. Ninau iho la o Liloa: “Auhea ko makuahine, o Akahiakuleana?” I aku o Umi: “Aia no ke noho la. Nana no wau i kuhikuhi mai nei ia oe, a me keia mau mea au i waiho ai ia ia.” A ike o Liloa i keia mau mea, olelo aku la ia i kona poe kanaka: “O kuu malo keia, me kuu niho palaoa.” Ninau mai la ia ia Umi: “Auhea kuu laau palau?” I aku o Umi: “Eia ’ku no i kuu hoahele ma waho, ia Omaokamau.” Alaila, kii ia aku la o Omaokamau me Piimaiwaa.