Mehe mea la o Kuluwaiea he kane ia na Haumea nae, alaila moe aku, moe ia Hinanuialana, hanau o Molokai, he akua, a he kahuna. Ma ka moolelo hoi o Lanai, aole i haiia mai kona wahi i puka mai ai, aka, ua ikeia ma kona moolelo he keiki hookama o Lanai; pela e maopopo ai ma ke mele a Kahakuikamoana ma ka pauku 4 o ua mele la, a penei ka heluhelu ana: “Ku mai ke alii, ka lani, Ka haluku wai ea o Tahiti. Loaa o Lanai he keiki hookama.” Ma ka moolelo hoi o Kahoolawe ua maopopo kahi i puka mai ai o Kahoolawe, ua hanau lopaia mai oia. No ka mea, o Keaukanai ke kane, moe aku ia Walinuu, ka wahine, no Holani mai, hanau o Kahoolawe. A penei e heluhelu ai i ke mele ma ka pauku 5: “Na Keaukanai i moe aku, Moe ia Walinuu o Holani, He keakea kapu no Uluhina, Hanau Kahoolawe, he lopa.” O ka mea kupanaha keia i ka nana ana i ka moolelo no Kahoolawe, mehe mea la no Hawaii nei o Keaukanai, a no Holani mai o Walinuu. O ka moolelo hoi no Molokini, ua oleloia, he malo no Uluhina, he alii nui, he alii oki piko no na keiki hanau hou. A penei ke kaao ana no Molokini. I ka manawa i hanau ae ai o Walinuu ia Kahoolawe, kiiia aku o Uluhina e hele mai e oki i ka piko o Kahoolawe, a hiki mai la ua o Uluhina, a oki ae la i ka piko o Kahoolawe, alaila hume ae la o Uluhina i ka iewe, a kiola aku la i loko o ke kai loaa ai o Molokini, he iewe, a o ka inoa o Molokini, ua kapaia i ka malo o Uluhina; a penei e heluhelu ai ma ke mele, pauku 6. “Kiina aku Uluhina, Moku ka piko o ke kamaiki, Ka iewe o ke keiki i lele I komo i loko o ka ape nalu; Ka apeape kai aleale, Loaa ka malo o ke kama. O Molokini ka moku He iewe ia -a-, He iewe ka moku.” Ma ka moolelo hoi o Oahu, ua oleloia, he alii nui o Oahu, he wohi na Ahukinialaa, na laua o Laamealaakona, a penei ka heluhelu ana ma ka pauku 7. “Ku mai Ahukinialaa, He alii mai ka nanamu; Mai ka ape o ka ia; Mai ka ale poi pu o Halehalekalani, Loaa o Oahu, he wohi, He wohi na Ahukinialaa Na Laamealaakona he wahine.” Ma ka moolelo hoi o Kauai, ua oleloia, hookahi makuawahine o Oahu me Kauai, a ua okoa na makuakane; no ka mea, o Ahukinialaa kai noho aku ia Laamealaakona, hanau Oahu he wohi; a noho aku hoi o Laakapu ia Laamealaakona, hanau o Kauai. A penei ke kaao ana no Kauai. I ka manawa i hookauhua ai o Laamealaakona ia Kauai, i loko no o ka hale kapu kahi i hookauhua ai, maloko o ka heiau a Nonea, a i ka la i ka malama o Makalii, i ka la i kauwila ai ua heiau la, oia ka la i hanau ai o Kauai; a o keia ke alii i huipuia me ka mooalii o Hawaii. A penei e heluhelu ai i ka moolelo no Kauai ma ke mele e hoomaka ana ma ka pauku 8: “Na Laakapu he kane ia, Na Laamealaakona he wahine Hookauhua hoiloli, I ka Nuupoki alii, Ka heiau kapu a Nonea I kauwila i ka po kapu o Makalii, Hanau Kauai he alii, he kama, he pua alii. He huhui alii na Hawaii, Na ke poo kelakela o na moku.”